БИШКЕК, 31-май — Sputnik. Кытай Украина боюнча өтө турган Швейцариядагы конференцияга катышуудан баш тартканын Reuters агенттиги өзүнүн маалымат булактарына таянып билдирди.
"Пекин койгон шарттары аткарылбагандыктан катышуудан баш тартты. Буга Россия өкүлдөрүнүн жок болору да себеп экени айтылат", — деп жазылган макалада.
Буга чейин "Блумберг" агенттиги өзүнүн маалымат булактарына таянып, Кытай улук мамлекеттик кызматкерлеринин катышуусу менен чектелсе, Бразилия жана Индия Швейцариядагы бул иш-чарага кенже аткаминерлерин жөнөтөрүн билдирген.
Швейцарияда 15-16-июнда Люцернден анча алыс эмес жерде Украина боюнча конференция өтөт.
Берн шаарындагы элчиликтин маалымат катчысы Владимир Хохлов Швейцария РФке аталган саммитке катышууга чакыруу жибербегендигин, бирок Москва баары бир катышпай тургандыгын айткан. Ал саммиттин уюштуруучулары тарабынан жайылтылып жаткан тынчтык идеясын Россия эч кабылдай албай турганын кошумчалаган болчу. Катчынын айтымында, мында Россиянын кызыкчылыгы эске алынбастан "келечеги жок "тынчтык формуласын" жүзөгө ашырууга аракет" тууралуу кеп жүрүүдө.
РФ президентинин маалымат катчысы Дмитрий Песков буга чейин Украина боюнча Россиясыз сүйлөшүүлөрдүн мааниси жок экенин, Швейцарияда өтчү саммитте "тынчтык формуласынын" кайсынысы тууралуу сөз болорун түшүнүү керектигин айткан.
Москва сүйлөшүүлөргө даярдыгын бир нече ирет эскерткен, бирок Киев буга мыйзам менен тыюу салган болчу. Батыш да Россиянын дилгирлигине карабай дайым сүйлөшүүлөргө үндөп, Украинанын диалогдон баш тартканын көз жаздымда калтырып келет. Буга чейин Кремль Украинада тынчтык орнотууга эч негиз жок экенин, Россия үчүн атайын операцияны максатына жеткирүү артыкчылыктуу багыт экенин билдирген. Москванын айтымында, буга азырынча аскердик жол менен гана жетүү мүмкүн болуп турат. Украинагы абал азыркы кырдаалды жана өзгөрүүлөрдү эске алганда гана тынчышы ыктымал, ал эми Москванын талаптары баарына маалым экени айтылган.