БИШКЕК, 31-май — Sputnik. АКШнын президенти Жозеф Байден Харьковдун кооптуулугуна коркунуч жараткан Россиянын аймактарындагы буталарды америкалык курал менен контрбатареялык күрөш жүргүзүү үчүн аткылоого Украинага уруксат берди. Бирок ыкчам-тактикалык ATACMS ракеталарын жана алыска атылуучу башка каражаттарга салынган тыюу күчүндө калганын РИА Новости Мамдепартаменттин өкүлүнө таянып билдирди.
"Президент жакында эле өзүнүн командасына АКШ берген куралдарды Харьков аймагында контрбатареялык максатта Россиялык күчтөргө жооп кылуу үчүн колдонууга мүмкүнчүлүк жаратып берүүнү тапшырды. Бул Украинага аларга чабуул жасаганга же ага камынып жатканы үчүн кайтара турган жообу", — деген агенттиктин маектеши.
New York Times Пентагон Украинанын аскердик күчтөрүнө сокку урула турган РФтеги буталарды сүрөттөп, тактап берүүгө милдеттенме алганын жазды.
"Пентагонго Россиянын кайсы жерлерине чабуул жасоо үчүн Украинага так сунуш берүүгө тапшырма берилди", — деп жазган басылма.
Буга чейин Politico Байден америкалык куралдарды "Харьковдогу каршылык кылган" согуштан улам Россияга карата колдонууга Киевге жашыруун уруксат бергенин атын атагысы келбеген аткаминерге таянып кабарлаган эле. Гезиттин маалыматында, кеп Харьков облусу менен чек арага жакын аймак жөнүндө гана болууда, ал эми Киевдин Россиянын түпкүрүнө сокку уруусуна карата Ак үйдүн позициясы "өзгөргөн жок".
Соңку учурларда Батыштын саясатчылары Украинанын Куралдуу күчтөрүнүн Россия аймактарына чабуул жасашы керектиги тууралуу көбүрөөк айта башташты. Мындай чакырыкты жакында эле НАТОнун башкы катчысы Йенс Столтенберг да жасаган. Эртеси Франция лидери Эммануэль Макрон бул позицияны колдой турганын, Украина Россияны кайсы жактан аткылап жатса, ошол жерлерде чабуул жасоо керектигин айткан. Дания ТИМ башчысы Ларс Лекке Расмуссен мындай сокку жасоо үчүн F-16 истребителдерин колдонууга Киевге уруксат берерин жар салып жиберген.
Республикачыл-конгрессмен Мэтт Гетц Байдендин администрациясынын Украина чатагында америкалык куралдарды колдонууну караган алешем иштеринин кесепетинен дүйнөлүк үчүнчү согуш чыгып кетүү кооптуулугун эскертти.
Анын айтымында, администрациянын ырааттуу эмес кадамдары түйшөлдүрүп жатат. Конгрессчи америкалык курал менен Россиядагы буталарды аткылоого тыюу салуу акыл-эстүү кадамдардан болгон.
"Байдендин администрациясы саясатын алмаштырып, дагы олуттуу эскалацияга туш келүүгө тобокел кылып жатат. Анын жыйынтыгы дүйнөлүк үчүнчү согуш болушу мүмкүн", — деп жазган конгрессмен социалдык тармакка.
Ал эми Италия ТИМ башчысы, вице-премьер Антонио Таяни Украина Батыштын куралдарын өзүнүн аймагынын ичинде гана колдонушу керектигин эскерткен.
РФтин ТИМ башчысы Сергей Лавров Столтенбергдин чакырыгына комментарий берип, ал ыйгарым укуктарын ашыра баалап алганын белгилеген. Россия президентинин маалымат катчысы Дмитрий Песков НАТО бул жаатта кырдаалды ырбатып, аскердик эйфорияга алдырып жатканын белгилеген. Ал өзүнүн аймактарына урулган соккуга Россиянын бериши мүмкүн болгон жообун — тиешелүү тараптардын контрчараларын президент да, аскерлер да билерин кошумчалаган.