Уран кендерин иштетүүгө уруксат берген мыйзам долбоору Жогорку Кеңеште биринчи окууда каралып, колдоо тапты. Мыйзам долбоору боюнча жаратылыш ресурстары, экология жана техникалык көзөмөл министри Мелис Тургунбаев маалымат берген. Анын айтымында, уранды иштетүүгө салынган тыюу башка сейрек кездешүүчү металлдарды камтыган 83 кенди изилдеп, иштетүүгө жолтоо болууда. Министр аларды иштетүү өз кезегинде экономиканы жакшыртууга салым кошоруна ишеним артууда. Ошондой эле ал уранды иштетүү экологияга, калктын ден соолугуна зыянын тийгизбей турганын белгилеген. Жыйынтыгында мыйзам долбооруна 69 депутат "макул", үч эл өкүлү "каршы" добуш берди, документ колдоо тапты.
10-июндан тарта Бишкектеги Чүй проспектинде реконструкция иштери башталат. Бул тууралуу мэриянын маалымат кызматы кабарлады. Билдирмеге караганда, Чүй проспектинин Манас проспектинен Төрөкул Айтматов көчөсүнө чейинки бөлүгү оңдолмокчу. Биринчи этапта Манастан Панфиловго чейинки бөлүгү жасалат. Мындан тышкары, жакын арада Горький көчөсү. Манас проспектинен 7-Апрель көчөсүнө чейин; Юнусалиев көчөсү. Сухэ-Батордон Горький көчөсүнө чейин; Жибек Жолу. Курманжан даткадан Тоголок Молдого чейин кочолор жасалат.
Россия, Кыргызстан жана Казакстан саламаттык сактоо тармагында долбоор иштеп чыгууда. Бул тууралуу Sputnik агенттигинин маалымат борборунда өткөн "ЕАЭБ өлкөлөрүнүн санарип долбоорлору" аттуу видео көпүрөдө Евразия өнүктүрүү банкынын санариптик демилгелер дирекциясынын директору Александр Петров билдирди. Анын айтымында, эл аралык реабилитациялык Attilan платформасын эки жылдын ичинде ишке берүү пландалууда. "Долбоор жөнөкөй эмес. Ал бейтаптарга, анын ичинде майыптыгы барларга да экосистема түзүүгө багытталган. Демилгени Россия, Кыргызстан, Казакстан биргелешип ишке ашырат. Долбоорго кайрымдуулук фонддору, дарыгерлер, реабилитациялык борборлор катышып, ал аркылуу бейтаптар татаал протездерди же коляскаларды таба алышат. Платформаны эки жылдын ичинде ишке киргизүү пландалууда. Долбоор ЕАЭБден тыш да жайылат деп ишенебиз", — деди Петров.
Тамакка кошулган татымалдар даам чыгаргандан тышкары организмге да пайдалуу. Бул тууралуу диетолог Ирина Бережная Sputnik ридиосуна курган маегинде айтты. Адис аларды өтө аз өлчөмдө колдонуу керектигин эскерткен. Татымалдарда табигый фитонциддер бар, ал зат вирустардын көбөйүүсүн алдын алат жана антибактериялык күчкө ээ. "Татымалдарды дарылык үчүн да колдонсок болот. Мисалы, имбирди бал, лимон менен кошо пайдалансак кан тамырларды бекемдеп, кан жакшы жүгүрө баштайт. Ал эми куркума тамак сиңирүүгө, теринин өңүн жакшыртууга жардам берет, ичегидеги микробдор менен күрөшүүдө пайдалуу. Калемпир болсо кан тамырларды кеңейткендиктен адам ысый баштайт. Мындан тышкары, татымалдарда антиоксиданттык компоненттер бар", – деген Ирина Бережная. Ал татымалдар жүрөк-кан тамыр, панкреатит, холецистит менен жабыркагандарга, ичеги-карында өнөкөт оорулары, ашказанында жарасы барларга зыяндуу экенин кошумчалаган.///Э