БИШКЕК, 27-май — Sputnik. Өкмөт өлкөдө минималдуу киреше салыгынын эсебин өзгөртүүгө ниеттенүүдө. Депутат Дастан Бекешев мыйзам долбоору парламентте биринчи окуудан өткөнүн айтты.
Азыр минималдуу киреше салыгы эң аз кирешеге жараша эсептелет (аны ар бир район үчүн Салык кызматы аныктайт). Эми бийлик минималдуу киреше салыгын орточо айлык акыга жараша эсептөөнү сунуштап жатат.
Эмне өзгөрөт?
Маселен, азыр Бишкекте эң аз киреше 12 234 сомду түзөт. Айлык мындан аз болсо деле андан киреше салыгы алынат. Тактап айтсак, кызматкер ай сайын мамлекетке 1 223 сом чегерет (киреше салыгынын коюму — 10 пайыз).
Эгер өкмөттүн сунушу колдоо таап кабыл алынып калса минималдуу киреше салыгы орточо айлык акыга жараша эсептелет. Бишкекте бул сумма 30 749 сомго барабар. Анда минималдуу киреше салыгынын коюму шаарда 3 074 сомду түзүп калат.
Шарттуу түшүндүрсөк, 25 миң сом маяна алган киши киреше салыгын 3 074 сом менен берет (азыр 2 500 сом төлөйт). Демек, көбөйөт.
12 234 миңден аз алгандар деле орточо айлыктын (30 749 сомдун) 10 пайызын төлөп калат. Башкача айтканда, алардын киреше салыгы 1 815 сомго көбөйөт.
Бекешев Социалдык фондго берилчү камсыздандыруу төлөмдөрүн кыскартуу менен катарлаштыра киреше салыгын жогорулатуу пландалып жатканын белгиледи.