"Үчүнчү өлкөлөрдүн тургундары эгер каалоосу болсо башка жарандык катары Кыргызстандыкын ала алат. Ал үчүн өз жарандыгынан баш тартуу талап кылынбайт. Мындан сырткары, "туруктуу жашоого уруксат" деген статус бар. Муну да жарандык алгысы келбеген, бирок Кыргызстанда узак мөөнөттө жашап же тыгыз байланышта боло турган адамдар беш жыл республиканын аймагында жашаган соң ала алышат. Былтыртан баштап "мекен-карта" деген дагы бир статус берилип жатат. Ал дагы жарандык сыяктуу эле адамдарга бир топ мүмкүнчүлүктөрдү ачат. Бул кадамдардын баары биринчи кезекте Кыргызстанда төрөлүп-өсүп, бирок үчүнчү мамлекеттерге чыгып кеткен мекендештерге ыңгайлуу шарт түзүү максатында киргизилген. Ушундай башка жарандыгы барлар же негизи эле кыргызстандыктар паспортун алмаштырууда мөөнөтү өтүп кеткен болсо айып пул салынбайт. Жөн гана көрсөтүлгөн, эл төлөгөн сумманы төлөп документин жаңылап ала алышат", — деди Тиленова.