Борбор калаада Кыргызстан менен Тажикстандын чек ара делегацияларынын сүйлөшүүсү болуп өттү. Кыргыз-тажик чек арасын делимитациялоо жана демаркациялоо боюнча эки өлкөнүн өкмөттүк делегацияларынын жумушчу топторунун жана топографиялык жумушчу топторунун кезектеги жолугушуусу 19-майдан 25-майга чейин болгон. Тараптар кыргыз-тажик мамлекеттик чек ара сызыгынын калган тилкелерин аныктоо боюнча сунуштар менен алмашканы айтылат. Кийинки кезигүү Тажикстандын аймагында болот. Кыргызстан менен Тажикстандын чек арасынын узундугу 972 чакырымды түзөт. Буга чейин тараптар чек аранын 90 пайыздан ашыгын макулдашканы айтылган.
"Кыргыз почтасы" дүйнөлүк рейтингде үч жылдын ичинде 98-орундан 29-орунга чыккан. Бул тууралуу аталган ишканадан маалымдашты. Билдирүүгө ылайык, "Кыргыз почтасы" 2020-жылы дүйнөлүк почта союзуна мүчө өлкөлөрдүн рейтингинде 98-орунда болгон. "Ишкана 2021-жылы 65-орунга, 2022-жылы 60-орунга көтөрүлгөн. Ал эми былтыр 29-сапка чыккан", — деп айтылат маалыматта. Мындай натыйжа мекеменин инфраструктурасын, тейлөөнү жакшыртууга багытталган долбоорлорду ишке ашыруудан улам болгону белгиленди. "Трансчекаралык электрондук сооданы өнүктүрүү жана эл аралык жүк алмашууну тездетүү үчүн Кыргызстан жана Кытайдын почта кызматтарынын транспорт каражаттары үчүн "жашыл коридор" түзүлгөн. Эл аралык почта жөнөтмөлөрүн тез жана натыйжалуу жеткирүүнү камсыз кылуу үчүн Германия, Австрия, Эстония, Латвияда эл аралык алмашуу жайынын чет өлкөдөгү өкүлчүлүгү ачылды", — деп билдирди мекеме.
Россия-Кыргыз өнүктүрүү фондунун колдоосу менен Ош шаарында жоон суу түтүктөрү чыгарыла баштады. Фонддун маалыматы боюнча, Кыргызстанда буга чейин мындай товар чыгарылбагандыктан башка өлкөлөрдөн алууга туура келген. Учурда Ош шаарындагы ишкана диаметри 1,2 метрге чейинки түтүктөрдү чыгара баштады. Аны турмуш-тиричиликке гана эмес, ГЭСтердин курулушуна да пайдаланса болот. "Бул ишкана чыгарган товарлар эми импортту толугу менен жаба алат. Өлкө башчысы аймактарды өнүктүрүү тапшырмасын койгон. Ушундай ири долбоорлор тапшырманы ишке ашырууга өбөлгө болот. Заводдун ачылышы өлкөдөгү курулуш тармагынын өнүгүшүнө салым кошот", — деген фонддун Кыргызстандагы башкармалыгынын жетекчиси Артем Новиков. Учурда РКӨФтүн жардамы менен курулуш каражаттарын өндүрүү боюнча 250 долбоор иш алып барууда.
Биринчи кварталда Кыргызстанга эл аралык акча которуу системалары аркылуу каражат рубль, доллар, евро жана теңге менен жөнөтүлгөн. Алгачкы үч валюта боюнча кирешелердин өсүшү байкалганын Улуттук банк билдирди. Январь-март айларында жалпы көлөмү 42,6 миллиард сомду түзгөн 1,5 миллиондон ашык транзакция ишке ашырылган. Өткөн жылдын ушул мезгилине салыштырмалуу транзакциянын саны 7 пайызга азайган, бирок которуулардын көлөмү 7 пайызга өскөн.
Талас шаарындагы облустук музыкалык драма театрында "Музыканын тилинде" аталышындагы маданий эл аралык кече өтөт. Бул тууралуу Россиянын Бишкектеги илим жана маданият бор