Президент Садыр Жапаров мектеп бүтүрүүчүлөрүн акыркы коңгуроо салтанаты менен куттуктады. Ал Ысык-Көл облусундагы "Акылман" президенттик лицейинде өтүп жаткан "Акылман - билим дүйнөсүндө" аттуу иш-чарага катышты. "Бүгүн өлкөбүздүн бардык мектептеринде акыркы коңгуроо салтанаты өтүп жатат. Мүмкүнчүлүктөн пайдаланып билим уясынан турмуш сапарына канат каккан бүтүрүүчүлөргө ак жол каалай кетейин. Бул күн – бүтүрүүчүлөрдүн ар биринин жашоосунда эстен кетпей турган эң маанилүү күн. Билим алган мектеп, таалим-тарбия берген мугалимдер менен коштошуп, турмуш жолуна аттанууга акыркы коңгуроо кагылып турат", – деген Жапаров. Өлкө башчы бүтүрүүчүлөр үчүн алдыда эң маанилүү маселе – кесип тандоо турганына токтолгон. "Силер турмуштун даңгыр жолунда ордуңарды таап, өлкөбүздүн өсүп-өнүгүшүнө салым кошуу менен коом алдында жоопкерчилик алууга даяр болушуңар зарыл. Силерге жети өлчөп, бир кесип, жеке мүмкүнчүлүк, жөндөмүңөрдү байкап, каалооңор менен акыл көрөңгөңөр туура келген кесипти тандоого тилектешмин. Кандай кесипти тандасаңар дагы ата-энеңер, агай-эжейлериңер сыяктуу мен дагы албан-албан ийгиликтерди жаратышыңарды каалайм. Себеби силерге бүткүл өлкө, жалпы журтубуз үмүт артып турат", – деген президент куттуктоосунда.
Акыйкатчы Жамиля Жаманбаева Таласта жаш келиндин жана анын кичинекей балдарынын өзгөчө мыкаачылык менен өлтүрүлүшүнө тынчсыздануусун билдирди. Бул тууралуу Омбудсмендин маалымат кызматы кабарлады. Жаманбаева мамлекеттик органдарды балдардын жана аялдардын коопсуздугун камсыздоо боюнча чукул чараларды көрүүгө чакырган. Ошондой эле акыйкатчы тез аранын ичинде сот органдарынан жана Юстиция министрлигинен пробациялык көзөмөлдү колдонуу маселесине көңүл бурууну талап кылган. “Кылмышкер шарттуу түрдө абактан бошотулгандан кийин өч алуу максатында зордук-зомбулукка кабылгандарга келип, катаал кылмыштарды жасаган биринчи жолку көрүнүш эмес”, — деген Жаманбаева. Ал маморгандар зомбулуктун курмандыктарын пробацияга алынган кылмышкерлерден коргоо үчүн бардык чараларды көрүүгө тийиш экенин, оор кылмыштар үчүн соттолгон кылмышкерлерге пробациялык көзөмөлдү колдонуу практикасы кылдат изилдөөнү жана кайра текшерүүнү талап кыларын белгилеген.
Талас шаарындагы облустук музыкалык драма театрында "Музыканын тилинде" аталышындагы маданий эл аралык кече өтөт. Бул тууралуу Россиянын Бишкектеги илим жана маданият борбору ("Русский дом") маалымдады. Билдирмеге ылайык, иш-чара орус акыны Александр Пушкиндин 225 жылдыгына жана Талас шаарынын 80 жылдыгына карата уюштурулууда. Маданий кече саат 18:30да башталат. Бул күнү сахнада Россиянын музыкалык үч тобу өнөрүн тартуулайт. Долбоор Талас шаардык мэриясынын колдоосунда Россиянын маданият министри жана Россотрудничествонун Кыргызстандагы өкүлчүлүгүнүн жардамы менен уюштурулары айтылды.
Бишкек — Ош жолунун 432-чакырымындагы Аксы районунун Сай айылында жол кырсыгы катталып, төрт киши каза болду. Бул тууралуу Жалал-Абад облусунун жол милициясы кабарлады. Каргаша кечээ, 24-майда, 06:30дар чамасында болгон. Анда Toyota Alphard унаасынын айдоочусу каршы тилкеде келе жаткан Daewoo Matiz машинасы менен сүзүшкөнү айтылат. Каргашадан 4 адам мүрт кетсе, 3 адам ар кандай жаракат алган.