Евразия экономикалык комиссиясынын кеңеши 14-майда өткөн отурумда ЕАЭБдин "Оюнчуктардын коопсуздугу жөнүндө" техникалык регламентине өзгөртүүлөрдү киргизди. Бул тууралуу Бегайым Ясынова Sputnik Кыргызстан радиосунун эфиринде маек куруп жатып билдирди.
Анын айтымында, рынокто оюнчуктардын ассортименти тынымсыз кеңейип, улам жаңы түрлөрү пайда болууда.
"Техникалык регламент — техникалык жөнгө салуу объектилерине карата талаптарды милдеттүү түрдө колдонууну жана сактоону белгилөөчү, эл аралык келишим менен кабыл алынган, мыйзамда белгиленген тартипте күчүнө кирген документ. Учурда ЕАЭБ өлкөлөрүндө 52 техрегламент болсо, анын 47си ишке кирген. Азыр "Оюнчуктардын коопсуздугу жөнүндө" техникалык регламентине өзгөртүүлөр кирип жатат. Себеби оюнчуктарды өндүрүү тармагы өнүгүп, рынокто алардын ассортименти тынымсыз кеңейип, улам сайын жаңы түрлөрү пайда болууда. Техникалык регламенттеги өзгөртүүлөр оюнчуктардын коопсуздук деңгээлин жогорулатат. Ошондой эле айрым жоболордун конкреттештирилиши ишкерлерге оюнчуктарга карата коопсуздук талаптарын туура сактап, өндүрүштүн натыйжалуулугун жогорулатууга мүмкүндүк берет. Алсак, техрегламент жаңы терминдер менен ("жыпар жыттуу оюнчук", "жумшак толтурулган оюнчук", "шылдырак", "даам көндүмдөрүн өнүктүрүү үчүн топтом") жана оюнчуктардын жаңы түрлөрүнө болгон талаптар менен (мисалы, жыт сезүүнү өнүктүрүү үчүн стол үстүндө ойнолуучу оюндар, даам топтомдору) толукталды. Кыргызстанда бир да оюнчук өндүрүүчү болбогондуктан дээрлик баары чет өлкөдөн келет. Андыктан товарды сырттан импорттогон ишкерлерге түшүндүрүү иштери жүргүзүлүп жатат", — деди Ясынова.
Ал техрегламентке өзгөртүүлөрдү киргизүү жөнүндө чечим расмий жарыяланган күндөн тартып 180 күндөн кийин күчүнө кирерин кошумчалады.