Балдар арасында мээнин, боор, бөйрөк жана көз органдарынын шишиктери кан рагынан кийинки эле орунда турат. Бул тууралуу Багынур Жумагазы кызы Sputnik Кыргызстан радиосуна маек куруп жатып билдирди.
Анын айтымында, ак кан оорусу жаңы төрөлгөн балдарда да аныкталган учурлар болот.
"Бир-эки күн мурун эле төрөлгөн балдарда да ак кан оорусу кездешкен учур жылына катталат. Биздин онкогематология бөлүмүндө 18 жашка чейинки балдар дарыланышат. Негизинен 3-12 жаш аралыгындагы балдар көп жатат. Акыркы он жылда өзгөрүүлөр да абдан көп болду. Анткени рак илдетине кабылган кичинекей бейтаптар көбөйүүдө. Биздин бөлүм Улуттук онкология ооруканасында турганда 20дан ашпаган гана орун болуп, онкология менен онкогематология бөлүмү чогуу иштечү. Кийин гана бөлүндү. Бейтаптардын саны өскөн сайын биз да кат менен кайрылып жатып, 2021-жылдан баштап Эне жана баланы коргоо улуттук борборуна которулганбыз. Ал жерде бизге төрт кабаттуу имарат берилген. Азыр онкология бөлүмүндө 35, онкогематология бөлүмүндө 35 орун бар. Балдар арасындагы рак илдетинин көбөйүшүнө ички жана сырткы миграция да роль ойноп жатат. Дарттын себептерин так айта албайбыз, көптөгөн факторлор бар. Стресс, тамак-аш, ата-эненин туруксуз жашоосу, толук эмес үй-бүлөлөр да себеп болуп калат. Ата-эненин ажырашуусу да бала үчүн чоң стресс. Балдар онкологиясы чоңдордукунан аябай айырмаланып турат, кичинекейлердин онкологиясында генетикалык мутациялар да бар," — деди Жумагазы кызы.
Ал онкологиянын себептерин так айтуу мүмкүн эместигин кошумчалады.