Министрлер кабинетинин төрагасы Акылбек Жапаров Түркмөнстандын президенти Сердар Бердымухамедов менен жолугушту. Бул тууралуу өкмөттүн маалымат кызматы билдирди.Жолугушууда тараптар соода-экономикалык алаканы күчөтүү, транзиттик транспортту өркүндөтүү, электр энергиясын импорттоо жана башка эки тараптуу кызматташтыкты өнүктүрүүнүн аспектилерин талкуулашты."2023-жылы эки өлкөнүн ортосундагы соода жүгүртүүнүн көлөмү 63 миллион 546 миң долларды түздү. Ошол эле учурда кыргыз-түркмөн мамилелеринин пайдаланыла элек олуттуу соода-экономикалык жана инвестициялык потенциалы бар", — деди Акылбек Жапаров.Минкаб башчысы Сердар Бердымухамедов менен Гурбангулы Бердымухамедовду Кыргызстанга чакырды.
Президент Садыр Жапаров бүгүн, 24-майда, КМШга мүчө-мамлекеттердин коопсуздук органдарынын жана атайын кызматтарынын жетекчилер кеңешинин мүчөлөрү менен жолугушту. Бул тууралуу өлкө башчынын маалымат кызматы билдирди. Белгилей кетсек, Бишкекте КМШга мүчө мамлекеттердин коопсуздук органдарынын жана атайын кызматтарынын жетекчилер кеңешинин 54-жыйыны өтүп жатат. Президент катышуучулар менен саламдашып жатып, КМШ мындан 30 жыл мурда олуттуу геосаясий өзгөрүүлөр учурунда түзүлгөнүн белгиледи. Ал ошондой эле Кыргызстан терроризмди чечкиндүү түрдө айыптай турганын баса белгиледи. Жапаров "Крокустагы" трагедиялуу окуя мамлекеттердин коопсуздугун камсыз кылуу үчүн биргелешкен күч-аракеттерди күчөтүү зарылдыгын дагы бир жолу көрсөткөнүн белгиледи.
Кыргыз-Россия өнүктүрүү фонду 2015-жылдан бери 678 миллион долларга 3 418 долбоорду каржылады. Бул тууралуу аталган фонддун аналитикалык департаментинин жетекчиси Сергей Фирсов Бишкекте өткөн ЕАЭБ жөнүндө келишимдин 10 жылдыгына арналган илимий-практикалык конференцияда билдирди.Ал "Кыргыз-Россия өнүктүрүү фондунун экономикалык интеграцияны өнүктүрүүдөгү ролу" аталышындагы доклад жасаган. Документте айтылгандай, 1-апрелге карата фонддун кредиттик портфели 337 миллион долларды түзүп, 710 долбоорду камтыйт."Фонд инвестициялык долбоорлор үчүн жеңилдетилген узак мөөнөттүү каржылоо берерин белгилөө зарыл. Уюм республиканын жети облусунда иш алып барат, ал каржыланган ишкана, жеке ишкерлердин жалпы кирешеси 121,7 миллиард сомду түзүп, 49 пайызга өскөн. Ал эми жалпы салыктык төлөмдөр 67 пайызга өсүп, 7,5 миллиард сомду түздү. Бул өлкө экономикасына түшкөн салыктык төлөмдөрдүн 4,1 пайызын түзөт", — деди Фирсов.
КМШ мамлекеттеринин атайын кызмат жетекчилеринин бүгүн Бишкекте өтүп жаткан отурумунда ФСБ башчысы Александр Бортников Афганстандагы кырдаал тууралуу айтты. Ал КМШга мүчө өлкөлөрдү аталган мамлекетте болуп жаткан нерселер тынчсыздандырбай койбостугун, анткен менен оң тенденциялардын байкалганын белгилеген.Ал англосакстардын Афганстандагы кырдаалга таасир этүү аракетин жана муну менен Борбор Азияда ордун бекемдеп, аймакты жалпы регионго таасир этүү үчүн аянтча катары пайдалануу максатын белгилеген.