Камбар – Ата-1 ГЭСинин курулушуна даярдык иштер жылдын этегинде жыйынтыкталат. Бул тууралуу Энергетика министрлиги билдирип, эмне иштер жасалганын тизмектеди. "Энергетиктердин негизги максаты — жыл аягына чейин даярдык иштерин бүткөрүү. Камбар-Ата-1 ГЭСин курууга багытталган даярдык иштери эки жылга пландалып, анда көпүрө салуу, суунун нугун буруу, туннель казуу, жол салуу жана аны бетондоо, электр зымдарын тартуу, жумушчулар учун убактылуу лагерь куруу каралган", — деп жазылат маалыматта. Белгилей кетсек, ГЭСтин болжолдонгон кубаттуулугу 1860 МВт, жылына 5,6 миллиард кВт-саат электр энергиясы өндүрүлөт. Плотинанын бийиктиги 256 метрди түзүп, 5,4 миллиард куб суу топтолот.
Министрлер кабинетинин төрагасы Акылбек Жапаров Сколково илим жана технология институтунун (Сколтех) коммуникациялар жана коомчулукту өнүктүрүү боюнча вице-президенти Алексей Ситников менен жолукту. Бул тууралуу өкмөттөн билдиришти. Жолугушууда билим берүү жана илим системасынын чакырыктарына жана муктаждыктарына ыкчам жооп берүүгө мүмкүндүк берген инновациялык башкаруу практикасын жана моделдерин киргизүү маселелери талкууланган. Тараптар ошондой эле ата мекендик ЖОЖдорду өнүктүрүү үчүн кеңейтилген мүмкүнчүлүктөрдү түзүүчү алдыңкы компетенцияларды жана технологияларды өнүктүрүү борборун уюштуруу маселесин карашты. Жыйынтыгында биргелешкен долбоорлор боюнча, анын ичинде жаңы долбоорлорду жана демилгелерди ишке ашыруунун алкагында кызматташууну арттыруу багытында макулдашууга жетишилди.
Евразия өнүктүрүү банкы Кыргызстандагы эң ири күн электр станцияларынын биринин курулушун каржылайт. Бул тууралуу банктын сайтында жазылган. Кеп Ысык-Көлдүн Тору-Айгыр айылындагы кубаттуулугу 300 мегаваттка жеткен станция жөнүндө болуп жатат. Евразия өнүктүрүү банкы 15 жылга 210 миллион долларга чейин каражат бөлмөкчү. Объектини ишке киргизүү 2025-жылдын аягына пландаштырылды. Банктын башкаруучу директору Денис Ильин долбоор Кыргызстандын энергетикалык коопсуздугун жогорулатып, электр станциясы эл аралык экологиялык жана техникалык стандарттарга жооп берерин белгилеген.
Кошмо Штаттар чет элдик агенттер боюнча грузиялык мыйзамга жооп кыла турган чараларды көрөт. Бул туурасында АКШнын мамлекеттик катчысы Энтони Блинкен Өкүлдөр палатасынын комитетинде айтканын РИА Новости жазды. "Жооп катары кандай чара көрүлөрүн ойлонуштуруп жатабыз. Кадамдарды жасайбыз деп күтүп жатам", — деген ал. Өткөн аптада Ак үйдүн маалымат катчысы Карин Жан-Пьер эгерде чет элдик агенттер жөнүндөгү мыйзам күчүнө кирсе Кошмо Штаттарга Грузия менен мамиленин тамырын карап көрүүгө туура келерин айткан эле. Мындан сырткары, Мамлекеттик департаменттин санкцияларды координациялоо башкармалыгынын башчысы Жим О'Брайен эгерде парламент кабыл алган мыйзам долбоорун өзгөртпөсө, жетекчилиги ЕБ жана башка өнөктөштөргө асылгандыгын токтотпосо Вашингтон Тбилисиге карата чектөөлөрдү киргизиши мүмкүндүгүн эскертти. Ведомствонун маалымат катчысынын орун басары Ведант Патель "азыркы мамиле АКШнын баалуулуктары менен макулдашылбагандыктан" грузин бийлиги мыйзамда каралган багыттан баш тартышы керектигин айтты.