БИШКЕК, 19-май — Sputnik. Россиянын экономикасы XXI кылымда 8 эсеге өсүп, доллар менен эсептегенде өсүш боюнча дүйнөнүн негизги экономикаларынын арасында онунчу орунду ээледи. Бул тууралуу Эл аралык валюта фондунун жана Дүйнөлүк банктын маалыматында айтылганын РИА Новости жазды.
Анда Япония ИДПсы азайган жалгыз өлкө болгону айтылган. Анын экономикасы өткөн кылымдын аягындагы 5 триллионго салыштырмалуу 15 пайызга, тагыраагы, 4,2 триллион долларга кыскарган.
Маалыматтар ИДПсы 100 миллиард доллар же андан көп болгон өлкөлөр үчүн гана берилген. Мындай мамлекеттер өткөн кылымдын аягында 35 болсо, 2023-жылдын акырына карата 68ге жеткен.
Россиянын экономикасы 23 жылдын ичинде 7,7 эсе өсүп, өткөн кылымдын аягындагы 260 миллиард доллардан эки триллионго жеткен.
Эң жогорку өсүштү 160 миллиард доллар менен (19,4 эсе) БРИКСке кошулган Эфиопия камсыздаган. Кийинки орунда ИДПсы 14,6 эсе өсүп, 17,7 триллион долларга жеткен Кытай турат. Үчүнчү саптагы Казакстандын экономикасы 14,2 эсеге өсүп, 18,3 миллиард доллардан 261 миллиард долларга жеткен.
Вьетнам өсүү темпи боюнча төртүнчү орунда (өсүү 13,9 эсеге, 434 миллиардга чейин), Катар алдыңкы бештикте (13,2 эсеге, 234 миллиард долларга чейин). Кошумчалай кетсек, алдыңкы ондукта экономикасы 9,3 эсе өсүп 346 миллиард долларга жеткен Румыния, Кения (8,6 эсе, 109 миллиард), Бангладеш (8,4 эсе, 446 миллиард) жана Индонезия (8, 3 эсе, 1,4 триллион доллар) бар.
БРИКСтеги Эфиопия, Кытай жана Россиядан башка Индияда өсүш байкалган. Анын экономикасы кылымдын башынан бери 7,6 эсе көтөрүлгөн. Бул жылдардын ичинде БАЭнин ИДПсы 4,8 эсе, Египеттики — 4 эсе, Ирандыкы — 3,7 эсе, Бразилияныкы — 3,3 эсе, Түштүк Африканыкы 2,5 эсе өскөн.