БИШКЕК, 18-май — Sputnik. Өкмөт "Торугарт", "Эркеч-Там" пунктулары аркылуу өткөн жүктөрдү күнүнө 1000 унаага жеткирүүнү максат кылууда. Бул тууралуу Акылбек Жапаров Кытайдын мамлекеттик кеңешинин вице-премьери Лю Гочжун менен жолугушууда билдиргенин өкмөттөн маалымдашты.
"Кытай тараптын маалыматы боюнча, өз ара соода жүгүртүүнүн көлөмү 2023-жылдын жыйынтыгында 19 миллиард 804 миллион долларды түздү, бул жагымдуу көрсөткүч. 2022-жылдагыга салыштырмалуу 30 пайызга көп", — деди Жапаров.
Ал эки өлкөнүн ортосундагы сооданын өсүшүнүн негизги фактору болгон "Торугарт", "Эркеч-Там" өткөрүү пунктуларынын толук кандуу иштешинин маанилүүлүгүн да белгиледи.
"Биз өткөрүү пунктулары күнү-түнү иштешин каалайбыз. Бул Кытайдан Кыргызстанга, андан ары үчүнчү өлкөлөргө дагы чоң көлөмдөгү жүк, товарларды экспорттоого мүмкүндүк берет. Анда жүктү күнүнө 1000 унаага жеткирүүнү максат кылып жатабыз", — деди Жапаров.
Минкаб төрагасы кытай тарапка Кыргызстандын айыл чарба продукциясын кабыл алуу жана сактоо үчүн "Торугарт" жана "Эркеч-Там" өткөрүү пунктуларынын жанындагы “Улугчат" бажы зонасында көзөмөл кампасынын курулушун тездетүүгө көмөк көрсөтүү өтүнүчүн билдирди.
Кытайдын Мамлекеттик кеңешинин вице-премьери Лю Гочжун кыргыз-кытай мамилелеринин жогорку деңгээлин белгилеп: "Кытай – Кыргызстан – Өзбекстан темир жолунун курулушу бүткүл аймак үчүн стратегиялык мааниге ээ жана долбоор боюнча иштерди тездетүү жана курулуш иштерин баштоо маанилүү", — деген.
Ошондой эле соода жүгүртүүнү көбөйтүү, өткөрүү пунктуларындагы жөндөмдүүлүктү жогорулатуу, "Бедел" өткөрмө пунктун ачуу, туризм тармагындагы кызматташтыкты кеңейтүүнүн маанилүүлүгүн кошумчалаган. Ал Кыргызстандын айыл чарба продукциясынын экспортуна Кытайдын рыногу ачык экенин белгиледи.