БИШКЕК, 17-май — Sputnik. Октябрь айынын орто ченинен тартып Мамлекеттик ипотекалык компаниядан үй алууга баштапкы сумманы топтой албай жаткандарга жаңы мүмкүнчүлүк ачылат. Бул тууралуу президент Садыр Жапаров социалдык тармактагы баракчасы аркылуу билдирди.
Айтымында, азыркы эреже боюнча, мамлекеттик кызматта иштебеген кардар МИКтен ала турган үйдүн баасынын жарым суммасын дароо төлөшү керек. Бирок баарында эле мындай мүмкүнчүлүк жок. Маселени чечүү үчүн РСК банкы менен Мамлекеттик ипотекалык компания (МИК) өнөктөштүктө иш жүргүзөт. Эки аптанын ичинде РСК банкынын аталышы "Элдик банк" деп өзгөртүлөт.
"Мисалы, батири 60 миң доллар турса, анын 30 миңин төгүш керек. Ал эми жарандын колунда 20 миң доллары бар дейли. Калганын кайдан алат? Батирге жетпей жаткан 10 миң долларды сизге "Элдик банк" беш жылга чейинки мөөнөткө 10 пайыз жылдык үстөк менен берип турат, ал үчүн күрөө талап кылбайт. Бюрократиясыз тез эле берет", — деди Жапаров.
Анда үй алгандар алгачкы беш жылда "Элдик банктан" алган каражаттан кутулары, андан кийин МИКтин калган 50 пайыз акчасын төлөй тургандыгы белгиленген. Бул мехнизм октябрдын ортосунан тартып иштей баштайт.
"Анткени "Банк жана банк ишмердүүлүгү жөнүндө" мыйзамга өзгөртүү киргизүү зарыл экен. Бул — биздин миграцияда жүргөн жарандарга, жалпы эле үйгө муктаждарга жеңилдик берүү үчүн сунуш кылынган механизм", — деди өлкө башчы.
Жапаров ошондой эле батирге деп акча топтоп жаткандарды азыртадан РСК банкынан эсеп ачууга чакырды.