Киреше салыгы жана мамлекеттик социалдык камсыздандыруу төгүмдөрү боюнча отчетту (STI-161) Cabinet.salyk.kg сайтынан гана тапшырууга болот. Бул тууралуу Салык кызматынын маалымат кызматынан билдиришти. 21-майдан тартып бул сервис Cabinet.salyk.kg сайтындагы салык төлөөчүнүн кабинетинде гана жеткиликтүү болот. Ошол эле учурда салык төлөөчүлөр отчетту Salyk.kg порталы аркылуу бере алышпайт. "Салык кызматы салык төлөөчүлөргө отчеттук мезгилде ыңгайсыздык жаралбашы үчүн cabinet.salyk.kg салык төлөөчүнүн кабинетине кирүү мүмкүнчүлүгүн алдын ала алууну же калыбына келтирүүнү сунуштайт", — деп жазылат маалыматта.
Бишкек шаарынын мэриясы ичүүчү суу менен жашыл жерлерди сугарууга, короо-сарайларды, килемдерди, унааларды жууп тазалоого катуу тыюу салынарын эскертти. Эгер суу эсептегич болсо түнкү саат 00:00дөн таңкы 05:00гө чейин жашыл жерлерди сугарууга уруксат берилери айтылды. Мэрия тарабынан такай текшерүү жүргүзүлүп, мыйзам бузуулар аныкталса, укук бузуулар жөнүндө кодексинин 119-беренесине ылайык 1000 сом өлчөмүндө айып салынат. Калкты ичүүчү суу менен үзгүлтүксүз камсыз кылуу максатында мэр Айбек Жунушалиев 2023-жылдын ноябрында «Бишкексууканал» ишканасына тиешелүү иштерди күчөтүлгөн режимде жүргүзүүнү жана бардык аракеттерди таза суу менен камсыздоону жакшыртууга багыттоо тапшырмасын берген.
Жол кыймылы коопсуздугун камсыздоо кызматынын инспектору пара алууга шектелүүдө. Бул тууралуу ИИМдин маалымат кызматынан билдиришти. Ага ылайык, ИИМдин ички иликтөө кызматына Айтматов (мурдагы Кара-Бура) районунун тургуну аны инспекторлор токтотуп, тиешелүү категориясы болбогондугуна байланыштуу 15 000 сом бергенин айтып арыз менен кайрылган. Тергөөдө Айтматов РИИБинин улук тескөөчүсү 300 сом айып салып, бирок арыз ээси тартып алган протоколдун көчүрмөсүндө 15 миң сом көрсөтүлгөнү аныкталган. "Факт боюнча кылмыш иш козголуп, 16-майда Айтматов РИИБинин улук инспектору А.Т. жана инспектору Э.Ж. 15 000 сомду ортомчу аркылуу ээсине кайтарып берген жеринен кармалган", — деп айтылат маалыматта.
Батыш өлкөлөрү Киевди сүйлөшүү принцибин кабыл алууга көндүрүүгө даярданып жатат. Бул тууралуу Europe1 радиостанциясы маалымат булагына таянып кабарлаганын РИА Новости жазды. Радиостанция белгилегендей, Киев сүйлөшүүлөрдү жүргүзүү жолун тандоого аргасыз. Анткени окуя жагымсыз сценарийде өнүгүп отуруп, Россиянын күчтөрү тарабынан башка фронт ачылып кетиши мүмкүн. Москва сүйлөшүүлөргө даярдыгын бир нече ирет эскерткен, бирок Киев буга мыйзам менен тыюу салган болчу. Батыш да Россиянын дилгирлигине карабай дайым сүйлөшүүлөргө үндөп, Украинанын диалогдон баш тартканын көз жаздымда калтырып келет. Буга чейин Кремль Украинада тынчтык орнотууга эч негиз жоктугун, Россия үчүн атайын операцияны максатына жеткирүү артыкчылыктуу багыт экенин билдирген. Москванын айтымында, буга азырынча аскердик жол менен гана жетүү мүмкүн болуп турат. Украинадагы абал азыркы кырдаалды жана өзгөрүүлөрдү эске алганда гана тынчышы ыктымал, ал эми Москванын талаптары баарына маалым экени айтылган.///ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 88 сом 26 тыйынга 1 евро 95 сом 98 тыйынга 1 рубль 96 тыйынга Казак тенгеси 19 тыйынга барабар
МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 64 сом 50 тыйындан баштап, 65 сом 90 тыйынга чейин, Аи 95 үлгүсүндөгү күйүүчү май 71 сом 90 тыйындан, дизель майы 73 сом 80 тыйындан, ал эми унаа газынын литри 33 сом 70 тыйындан сатылууда.
АБА ЫРАЙЫИшемби күнү көпчүлүк аймактарда жамгыр жаап, күн күркүрөп, бийик тоолуу райондордо кар жаайт. Айрым жерлерде жаан-чачын катуу жаайт. Бул тууралуу Кыргызгидромет маалымдады. Батыштан соккон шамалдын ылдамдыгы секундасына 4-9 метрден айрым жерлерде 15-20 метрге жетет. Абанын температурасы Чүй, Ош, Жалал-Абад жана Нарын облустарында +22...+27, Таласта +20...+25, Баткен менен Ысык-Көл жергесинде +21...+26 градус болот. Бишкек менен Ошто күндүн экинчи жарымында жамгыр жаап, күн күркүрөйт. Күндүн табы борбор калаада +24...+26, Ошто +25...+27 градуска жетет.