БИШКЕК, 16-май — Sputnik. Жалал-Абад облусунун үч тургунунан күйдүргү аныкталып, дарыланууда. Бул тууралуу Жалал-Абад район аралык ооруларды алдын алуу жана санитардык-эпидемиологиялык көзөмөлдөө борборунун башкы дарыгери Рома Ураимов билдирди.
Анын айтымында, бейтаптардын бирөө Көк-Жаңгак шаарында, экинчиси Жалал-Абад облустук клиникалык ооруканасында дарыланууда. Үчүнчүсү өз алдынча Бишкек шаарына чыгып, ооруканага жаткырылган.
"Бейтаптардын айтуусу боюнча, алардын музоосу жер төлөгө түшүп кеткен. Ал жакшы болбогондуктан 22-апрелде мал доктурдан уруксат албай эле союп, алты үй-бүлөгө: туугандарына, кошуналарына таратып жиберишкен. Жалпы 104 адам байланышта болгону аныкталган. Көк-Жаңгакта 39 жаштагы, Жалал-Абаддагы 66 жаштагы аялдар. Ал эми 65теги аял өз алдынча борбор калаага барып, ооруканага жаткырылган", — деди Ураимов.
Мал союлган жерден үлгү алынып, күйдүргү топурактан аныкталды. Анткени адам текшерүүгө чейин антибиотик колдонсо анализ таза чыга берери кошумчаланды.
Буга чейин Жалал-Абаддан келген аялдан күйдүргү аныкталганын Бишкек шаарындагы Мамлекеттик санитардык-эпидемиологиялык көзөмөл борбору маалымдаган. Медиктер илдет мал этинен жукканын божомолдоп жатышкан. Анткен менен Ветеринардык кызмат бейтап илдет жуктуруп алды делген малдын эти таза экенин билдирген.