БИШКЕК, 16-май — Sputnik. Россия президенти Владимир Путин Пекиндеги Элдик жыйын үйүнө келип, Кытайдын лидери Си Цзиньпин менен жолугуп сүйлөшүүдө. Бул туурасында РИА Новости билдирди.
Россия башчысы Кытайга эки күндүк мамлекеттик сапары менен келди, ал Пекинде жана Харбинде болот. Борбор калаада бүгүн Путин менен Си Цзиньпин тар чөйрөдө сүйлөшүп, андан соң тараптар кеңейтилген форматтагы пикир алышууга өтөт.
Буга чейин эки өлкө башчылары сапар учурунда ар тараптуу өнөктөштүктүн жана стратегиялык өз ара кызматташуунун бардык комплексин деталдуу талкуулашары айтылган. Ошондой эле орус-кытай практикалык кызматташтыгын мындан ары өнүктүрүүнүн негизги багыттарын аныкташат. Эң актуалдуу эл аралык жана аймактык маселелер боюнча пикир алмашуу дагы болот.
Элдик жыйын үйү борбордук Тяньаньмэнь аянтынын батыш тарабында жайгашкан. Ал Кытайдын Коммунисттик партиясынын съезддерин жана Жалпы Кытай эл өкүлдөрү чогула турган жер. Андан сырткары, расмий иш-чаралар, конференциялар өтүп, чет элдиктерди кабыл алчу жай болуп саналат.