БИШКЕК, 15-май — Sputnik. Жалал-Абад шаарындагы "Курманбек" стадиону толук реконструкциялангандан кийин пайдаланууга берилгенин Кыргыз футбол союзу маалымдады.
Билдирмеге ылайык, анда 5000 көрүүчүгө орундуктар, жарык берүүчү чырактар орнотулуп, бөлмөлөр оңдоп түзөлгөн. Мындан тышкары, Кыргызстанда биринчи жолу аталган стадионго VAR-системасы (калыстар видео аркылуу көрүү мүмкүнчүлүгү – ред.) орнотулары маалымдалды.
"Оңдоо иштери Кыргыз футбол союзу жана Жалал-Абад шаардык мэриясы тарабынан аткарылган. Стадион Азия футбол конфедерациясынын, Эл аралык футбол федерациясынын талаптарына толугу менен жооп берет. Анда эл аралык расмий оюндарды өткөрүүгө болот", – деп айтылат маалыматта.
Ачылыш аземине Кыргыз футбол союзунун президенти Камчыбек Ташиев да катышкан. Объектинин ачылышынан кийин дароо Кыргыз Республикасынын 1XBET премьер-лигасынын "Мурас Юнайтед" жана "Илбирс" командаларынын беттеши башталган.