БИШКЕК, 15-май — Sputnik. Түркиянын президенти Режеп Тайип Эрдоган Чалгын кызматы, Юстиция министрлигинин жетекчилери менен Түркиянын улутчулдар партиясынын лидери, үзөңгүлөшү Девлет Бахчелинин тартип коргоо органдарында мамлекеттик төңкөрүш даярдалып жатышы ыктымал деген эскертүүсүнөн кийин ыкчам отурум өткөрдү. Бул туурасында РИА Новости Türkiye басылмасына таянып кабарлады.
Түркияда Анкаранын Коопсуздук башкармалыгындагы бир топ полиция кызматкерлеринин иштен бошотулушу көп сөздүн башы болду. Алар кылмыштуу топ деп эсептелген "Айхан Бора Каплан" менен байланышы бар деп күнөөлөнгөн, үйлөрүн тинтишкен.
Эрдогандын үзөңгүлөштөрүнүн бири Девлет Бахчели парламентте сүйлөп жатып, 2016-жылдагы мамлекеттик төңкөрүш жасоо аракети кайталанышы мүмкүндүгүн айткан. Кеп бийликке карата кутум туурасында жүрүп жаткандыктан, бир нече полиция кызматкерлерин иштен алып коюу менен чектелип калууга болбостугун белгилеген.
"Президент Режеп Тайип Эрдоган Чалгын боюнча улуттук кызматтын жетекчиси Ибрагим Калын, юстиция министри Йылмаз Тунж менен Бахчелинин билдирүүсүнөн кийин түндө резиденциясында шашылыш кеңешме өткөрдү", — деп жазган басылма.
Бүгүн Эрдоган парламенттеги башкаруучу партиянын кеңейтилген кеңешмесинде сүйлөй турганы айтылды. Бир катар ЖМКлардын тартип коргоо органдарындагы мамлекеттик төңкөрүш тууралуу жазгандарынан кийин Х социалдык тармагында Эрдоганды колдогон посттор арбыды. Алар негизинен #DevletimizinYanındayız ("Мамлекетибиздин жанындабыз") деген хештег менен кетип жатат.
Түркия бийлиги муну уюштурууга FETÖ (Фетхүлленчилердин террордук уюму) деп ат коюшкан АКШда жашап жаткан дин аалымы Фетхуллах Гүленди күнөөлөп жатат. Ал 2016-жылдагы төңкөрүш жасоо аракетине катыштыгы бар деп айтылып, мунун артынан миңдеген кишилер күнөөлөнгөн. Түркиядагы ошол кездеги козголоңдон соң 80 миңден ашуун адам камалып, 150 миңге чукул мамлекеттик кызматкер жумуштан айдалган. Мунун ичинде күч түзүмдөрүндө иштегендер да арбын болгон. Гүлен бул кадамдарды сындап, төңкөрүш боюнча ага тагылган күнөөнү четке каккан.