БИШКЕК, 15-май — Sputnik. Кыргызстанга Малайзиянын премьер-министри Анвар Ибрагим расмий сапар менен келди. Ардактуу конокту "Манас" аэропортунан министрлер кабинетинин төрагасы Акылбек Жапаров тосуп алганын өкмөттөн кабарлашты.
Аэропорттогу флагштокторго Кыргыз Республикасынын жана Малайзиянын мамлекеттик желектери илинип, Ардак кароолдун ротасы тизилген.
Сапардын алкагында бир катар жолугушуулар пландаштырылган. Анын жүрүшүндө кыргыз-малайзиялык мамилелерди саясий, соода-экономикалык, энергетикалык жана маданий-гуманитардык тармактарда ар тараптуу өнүктүрүү маселелери талкууланары айтылды.
Эскерте кетсек, расмий сапардан улам Бишкек менен Чүйдөгү айрым көчөлөр жабылат.