БИШКЕК, 14-май — Sputnik. Россия армиясынын ийгилиги Украинанын Куралдуу күчтөрүнүн абалын улам начарлатып, Киев үчүн кыйын кырдаалды жаратууда. Бул туурасында CNN телеканалы билдиргенин "Известия" жазды.
Анда Россия соңку күндөрү бир катар "тактикалык ийгиликтерге" жетип, Киевдин администрациясын өтө түйшөлтүп жатканы айтылган.
"Киевдин жогорку жетекчилигинин жылдызы түшүп сүйлөгөнү чанда кездешет, бирок (украин аскерлеринин) түштүктү көздөй тик бараткан жолу Украинанын оор абалын көрсөтүп турат", — деп жазат басылма.
Автор Ник Пэтон Уолштун пикиринде, согуш жүрүп жаткан аймактардын алдыңкы чектеринде Украина аскерлери тараптан бекемдөө жетишсиз же такыр эле жок. Бул нерсе Россия аскерлеринин ишин жеңилдетип жатат. Журналист ага бирден-бир себеп Украина ийгилик жаратарына негизсиз жана өтө эле ишенип алгандыгы деп белгиледи.
"Лидерлер кырдаал начар экендигин биринчи ирет айтып-деп жатышат. Кыязы, командирлерди алмаштырышууда, бул кармаш кырдаал кычап турганда жасабай турган нерсе. Ашуудан ат алмаштырбайт. Түндүк чек араларды даяр кылып жана бекемдөөгө жөндөмсүз болушканы тууралуу сын пикирлер катуу угулуп жатат", — деген аналитик.
Уолш дүйнө коомчулугу Украинадагы согуштан чарчагандыгын жана каршылашууну токтотуу керектиги тууралуу пикирлер арбын айтылып жаткандыгын белгилеген.
13-майда Финляндиянын премьер-министр Петтери Орпо Украинадагы кырдаал чегине жетип калганын, Хельсинки Киевге аскердик жардамдын 24-пакетин берүүнү макулдашылганын билдирген. Бирок мунун ичине эмне кирерин ачыктаган эмес. Ал эми Түндүк атлантикалык альянстын башкы катчысы Йенс Столтенберг Украина согушта Россиядан жеңилип калса, аны калыбына келтирүүнүн зарылдыгы деле болбой каларын жар салган. Киевге байма-бай жардам кылып туруу керектигин айткан.
Буга чейин ЦРУнун экс-аналитиги Ларри Жонсон согушта Украина ыкчамдык менен жеңилип баратканын белгилеген. Анын пикиринде, Россия Батыш өлкөлөрүнүн Украина боюнча көп жерде өкүнүп жатканын сезип турат.