БИШКЕК, 13-май — Sputnik. Жеңил атлетика боюнча улуттук курама команданын мүчөлөрү Илья Тяпкин жана Сардана Трофимова Парижде өтө турган Олимпиада оюндарына жолдомо алышты. Бул тууралуу World Athletics Дүйнөлүк жеңил атлетика федерациясынын сайтында жарыяланганын Дене тарбия жана спорт департаментинен билдиришти.
Ушуну менен Кыргызстандын куржунунда 13 лицензия болду. Анын ичинен ону күрөштүн түрлөрү боюнча, бирөө сууда сүзүү жана экөө жеңил атлетикадан.
Белгилей кетсек, жайкы Олимпиада оюндары Франциянын борборунда 26-июлдан 11-августка чейин өтөт.