БИШКЕК, 13-май — Sputnik. Россиянын президенти Владимир Путин Андрей Белоусовдун талапкерлигин коргонуу министри болууга сунуштады. Бул туурасында маалымат Федерация кеңешинин Telegram каналында жазылган.
Буга чейин аталган кызматта турган Сергей Шойгуну президент Коопсуздук кеңешинин катчысы кылып дайындап, башка жарлык менен буга чейин аталган кызматта иштеп келген Николай Патрушевди бошотту.
Путиндин маалымат катчысы Дмитрий Песков Кремль президенттин жаңы дайындоолору тууралуу кечирээк билдирерин айтты. Анын айтымында, Белоусовдун талапкерлиги ведомство инновацияларды, алдыңкы идеяларды киргизүүгө ачык жана экономикалык жактан атаандаштыктын шартында туруктуу болушу керек деген жүйө менен сунушталган.
"Учурдун динамикасына туура келгендей кылып күч түзүмдөр блогунун экономикасын өлкөнүн экономикасына ылайыкташтыруу өтө маанилүү", — деп баса белгилеген ал.
Белоусов мамлекетик кызматта 2006-жылдан тарта иштеп келет. 2006-2008-жылдар аралыгында экономикалык өнүгүү министринин орун басары кызматын аркаласа, 2008-2012-жылдары өкмөттүн Экономика жана финансы департаментин жетектеген. Андан соң бир жыл экономикалык өнүгүү министри болгон. 2013-жылдын 24-июнунан тарта президенттин жардамчысы болуп иштеп, 2018-жылы 13-июнда бул ишине кайра дайындалган. 2020-жылдын 21-январында өкмөттүн биринчи орун басары болгон.
Песков Шойгу азыркы кызматы менен кошо эле Аскердик-өнөр жай комплекси боюнча комиссияда мамлекет башчынын орун басары макамында иштей турганын айтты. Мындан тышкары, Аскердик-техникалык кызматташуу боюнча түзүлгөн федералдык кызматты карамакчы. Маалымат катчынын айтымында, Шойгу ичинен жакшы билген бул тармакта эмгектенүүсүн улантат.
РИА Новости Куралдуу күчтөрдүн Башкы штабынын жетекчиси Валерий Герасимов өз кызматында каларын жазган.
Федерация кеңешине президент сунуштаган талапкердин тизмеси төмөнкүдөй:
ички иштер министри — Владимир Колокольцев;
жарандык коргонуу, өзгөчө кырдаалдар жана жаратылыш кырсыктарынын кесепетин жоюу министри — Александр Куренков;
тышкы иштер министри — Сергей Лавров;
юстиция министри — Константин Чуйченко;
Тышкы чалгын кызматынын директору — Сергей Нарышкин;
Коопсуздук боюнча федералдык кызматтын директору — Александр Бортников;
Улуттук Гвардиянын күчтөрүнүн федералдык кызматынын директору — Виктор;
Федералдык күзөт кызматынын директору — Дмитрий Кочнев;
президенттин атайын программалар боюнча башкы башкармалыгынын жетекчиси — Александр Линец;
Эсеп палатасынын төрагасы — Борис Ковальчук.
Федерация кеңешинин мүчөлөрү бүгүн комитеттерде отурум өткөрүп, кеңешип, эртең, 14-майда, парламенттин жогорку палатасына жөнөтөт.
Владимир Путин Михаил Мишустинди 10-майда өкмөттүн төрагалыгына бекитти. Премьер Путинге аткаруу бийлигинин федералдык органдарынын түзүмү боюнча сунушун берип, мамлекет башчы бул боюнча тиешелүү жарлыкка кол койду. Премьер Мамлекеттик Думага өзүнүн орун басарлары жана бир катар министрлердин талапкерлигин киргизди. Жекшембиде төмөнкү палатанын бир катар комитеттери аларды жактырган. Парламентарийлер эми бүгүн же эртең болчу отурумга даяр. Анда вице-премьерлер менен бир нече министрлерди бекитүү маселеси талкууланмакчы. Бул боюнча тиешелүү токтом долбоору Мамдумага киргизилген.