БИШКЕК, 12-май — Sputnik. Евробиримдик Россиянын тоңдурулган активдеринин кирешесинен бере турган бир нече миллиард евро Киевге огожо боло албайт. Бул тууралуу Украинанын коргоо министри Денис Малюська Politico басылмасына маек куруп жатып айтты.
Эскерте кетсек, буга чейин Германиянын канцлери Олаф Шольц Евробиримдик РФ активдеринен түшкөн кирешенин 90 пайызын Украинанын аскердик муктаждыгына жумшоо боюнча бир пикирге келгенин билдирген. Анын айтымында, кеп жылына бир нече миллиард доллар берүү тууралуу болуп жатат.
"Украинанын учурдагы абалы, чыгымы жана муктаждыгы жөнүндө сөз кыла турган болсок, үч миллиард евро эч нерсеге тыгынчык боло албайт", — деди Малюська.
Анын айтымында, Киевге "жеңиш" үчүн жүздөгөн миллиарддар керек. Анткен менен министр ЕБдин чечимин "үзүрлүү кадам" деп атап, Украина тоңдурулган россиялык активдердин толугу менен конфискацияланышын көздөй турганын кошумчалаган.
Украинада атайын операция башталгандан тарта Евробиримдик менен G7 өлкөлөрү россиялык валюта резервинин жарымын — 300 миллиард еврого чукул каражатты тоңдуруп салышкан. Сумманын 200 миллиарды дүйнөдөгү эң ири эсеп-клирингдик система болгон бельгиялык Euroclear эсебинде. Евробиримдикте тоңдурулган активдерди Украинаны калыбына келтирүү үчүн жумшоо талкууланып келет. Европанын Борбордук банкы бул кадам келечекте европа валютасынын кадырына доо кетириши мүмкүн экенин белгилеп, "учурдагы жаңжалдан кененирээк" ойлонуп, Киевге жардам берүүнүн башка ыкмаларын карап көрүүгө чакырган.
Ал эми Кремль мындай чечимдер "эл аралык укук жана нормаларды бузган дагы бир кадам" болорун эскерткен. Россия ТИМи активдердин тоңдурулушун уурулук деп атап, Евробиримдик жеке жактардын эле эмес, мамлекеттин да каражатына көз артып жатканын белгилеген.