Бишкек — Кара-Балта жолуна салынган асфальттын бир бөлүгү кайра алынат. Бул тууралуу Архитектура, курулуш жана турак-жай-коммуналдык чарба мамлекеттик агенттигинен билдиришти. Маалыматка ылайык, апрелде жолго асфальт төшөлгөндөн кийин мамкурулуш текшерип, кемчиликтер аныкталган. Аталган тарссанын Александровка айылынын тушундагы бөлүгүндө 217 метрлик жерди кайра жасоо тапшырылганы белгиленди. Эми подрядчы кытай компаниясы бир айдын ичинде жолго жаңы асфальт төшөп чыгышы керект. Белгилей кетсек, Бишкек — Кара-Балта жолун реконструкциялоо 2017-жылы башталган. Жалпы узундугу 52,5 чакырымды түзөт. Калктуу конуштардагы оңдолгон жолдун негизги унаа жүрүүчү бөлүгү алты тилкелүү болуп, туурасы 3,5 метрди түзөт.
«Айыл чарбасын каржылоо -12» долбоору боюнча 2024-жылдын 11-майына карата дыйкан жана фермерлерге жалпы 4 миң 890 насыя берилди. Суу ресурстары, айыл чарба жана кайра иштетүү өнөр жайым министрлигинен билдиришкендей, каржылоонун көлөмү 1 млрд. 974 млн. 108 миң сомду түздү. Өсүмдүк өстүрүү категориясы боюнча жалпы 193 млн. 317 миң сомго 613 насыя, ал эми мал чарбачылык категориясы боюнча жалпы 1млрд. 780 млн. 791 миң сомго 4 миң 277 насыя берилди.
Түндүк-Түштүк альтернативдик жолунун жер көчкү түшкөн тилкеси тазаланууда. Бул тууралуу Транспорт жана коммуникациялар министрлигинен кабарлашты. 10-майда саат 21:00-22:00 чамаларында Түндүк-Түштүк альтернативдик унаа жолунун 354-тилкесинде жер көчкү жыла баштап, азыркы учурга чейин уланууда. Белгиленгендей, учурда каттам бир тараптуу ачык. Бирок, азыркы тапта да жер көчкү акырындап жылып жаткандыгына байланыштуу кийинки аракеттер кырдаалга жараша болмокчу.
Режиссёр Руслан Акундун "Бейиш эненин таманында" тасмасы III Эл аралык кинофестивалдын баш байгеси менен сыйланды. Бул тууралуу ТИМ билдирди. Маалыматка ылайык, 10-майда Кыргызстандын Россиядагы элчилиги Москванын Жеңиш музейинде III Эл аралык туура багыттагы кино фестивалынын байгелерин тапшыруу аземине катышкан. "Салтанатта "Дебют", "Мыкты режиссёр", "Мыкты даректүү тасма", "Мыкты кыска метраждуу фильм", "Мыкты анимациялык фильм", "Мыкты сценарий", "Биздин замандын каармандары" номинациялары боюнча фестивалдын жеңүүчүлөрү аныкталды", — деп айтылат маалыматта. Конкурстун баш байгесине кыргызстандык режиссер Руслан Акундун "Бейиш эненин таманында" тасмасы татыды. Сынакка жалпысынан 140тан ашык арыз келип түшкөн. Анын ичинен Россия, Беларусь, Кыргызстан, Кытай, Сербия жана башка өлкөлөрдөн 33 эмгек тандалып алынган. Эл аралык туура багыттагы кино фестивалы 2022-жылдан бери өткөрүлүп келет. 2023-жылдан бери фестиваль эл аралык статуска ээ.
ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 88 сом 36 тыйынга 1 евро 95 сом 26 тыйынга 1 рубль 95 тыйынга Казак тенгеси 20 тыйынга барабар
МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 64 сом 50 тыйындан баштап, 65 сом 90 тыйынга чейин, Аи 95 үлгүсүндөгү күйүүчү май 71 сом 90 тыйындан, дизель майы 73 сом 80 тыйындан, ал эми унаа газынын литри 33 сом 70 тыйындан сатылууда.
АБА ЫРАЙЫЖекшемби күнү көпчүлүк аймактарда жамгыр жаап, күн күркүрөп, бийик тоолуу райондордо кар жаайт. Бул тууралуу Кыргызгидромет маалымдады. Батыштан соккон шамалдын ылдамдыгы секундасына 4-9 метрге жетет. Абанын температурасы Чүй өрөөнүндө +15...+20, Таласта +14...+19, Ош, Жалал-Абад жана Баткен облустарында +18...+23, Ысык-Көл менен Нарын жергесинде +17...+22 градус болот. Бишкекте түнкүсүн, Ошто күндүз мезгил-мезгили менен жамгыр жаап, күн күркүрөйт. Күндүн табы борбор калаада +17...+19, Ошто +21...+23 градуска көтөрүлөт.