Өткөн жылы банк сектору 107,4 миллиард сом киреше таап, өсүш 16 пайызды түздү. Бул тууралуу Улуттук статистика комитетинин маалыматында айтылат. Белгиленгендей, жыл сайын 10-майда банк кызматкерлери кесиптик майрамын белгилешет. Банк сектору экономиканын ажырагыс бөлүгү болуп, экономиканын өсүшүнө жана туруктуулугуна чоң салым кошот.Экономиканын банк секторунун суммардык активдери бир жылдын ичинде дээрлик 21 пайызга көбөйүп, 2023-жылдын аягына карата 1 триллион 58,8 миллиард сомду түздү. Активдердин наркынын 58 пайызга жакыны коммерциялык банктарга, 42 пайызы Улуттук банкка туура келет.
Өлкөдө жарым жылга жумуртканын импортуна тыюу салуу сунушталууда. Тиешелүү токтом долбоорун Суу ресурстары, айыл чарба жана кайра иштетүү өнөр жайы министрлиги коомдук талкууга койду. Мындай чечимди жергиликтүү ишкерлердин кайрылуусунан кийин кабыл алуу каралган. Алар ички муктаждыкты толук камсыздай турганына ынандырышууда. Максаты азык-түлүк коопсуздугун камсыз кылуу, бааны турукташтыруу жана жергиликтүү өндүрүүчүлөрдү колдоо экени айтылган. "Кыргызстанда ири жана үй-бүлөлүк майда чарбаларда жумуртка өндүрүлөт. Бул сектор өлкөнүн айыл чарбасынын олуттуу үлүшүн түзүп, көптөгөн айыл тургундары үчүн кирешенин маанилүү булагы болуп саналат", — деп жазылган документтин негиздемесинде. Республикада соңку эки жылда канаттуулар чарбачылыгы кеңейип, жергиликтүү өндүрүш болжол менен эки эсеге өскөнү кошумчаланды.
Улуттук банк бүгүндөн баштап 5000 сомдук жаңы банкнотаны жүгүртүүгө чыгарды. Бул тууралуу башкы банктын маалымат кызматы кабарлап, сүрөтүн жарыялады. Ага ылайык, бул — улуттук валютанын бешинчи сериядагы үлгүсү.Банкнотанын алдыңкы бетинде кыргыздын залкар инсаны, актёр жана сүрөтчү Сүймөнкул Чокморовдун сүрөтү, арткы бетинде "Ала-Тоо" кинотеатрынын имараты сакталган. Купюранын түсү жана өлчөмү өзгөргөн эмес.Улуттук валютанын бардык банкноталары өлкө аймагында расмий төлөм каражаты статусуна ээ жана чыгарылган жылына карабастан төлөм каражаты катары милдеттүү түрдө кабыл алынууга тийиш
Жаратылыш ресурстары, экология жана техникалык көзөмөл министрлиги "Кыргыз мерген" мамлекеттик ишканасын түзүүнү сунуштоодо. Тиешелүү токтомго өзгөртүү долбоору коомдук талкууга чыгарылды.Документтин негиздемесинде аталган мамлекеттик ишкананын уставын бекитүү бюджетке кирешени көбөйтүү максатында иштелип чыкканы айтылган.Ошондой эле учурда өлкөдө 14,4 миллион гектар аянтта 52 аңчылык фирма иш алып барары, бул өз кезегинде жапайы жаныбарлардын популяциясын көзөмөлдөөгө жол ачары белгиленген. Бирок жыл сайын мыйзамсыз аң уулоо күч алып, былтыр 240 мыйзам бузуу факты аныкталган. "Өкмөттүн 2016-жылдын 11-августундагы токтомуна ылайык конкурс өткөрүлүп, жеңүүчүлөрү менен мергенчилик чарба ишин жүргүзүү жөнүндө келишимдер түзүлгөн. Бүгүнкү күндө көпчүлүгүнүн мөөнөтү аяктагандыгына байланыштуу министрлик тарабынан кайтаруу жана биотехникалык иш-чаралардын сапатын жакшыртууга жана чет элдик аңчылыктан түшкөн каражатты эки эсе көбөйтүүгө көмөктөшө турган мамлекеттик ишкана түзүү сунушталууда", — деп жазылат маалыматта. Ошондой эле былтыр аңчылыктан 105 миллион 267 миң 500 сом түшкөнү кошумчаланды.