БИШКЕК, 10-май — Sputnik. Унаа башкарып баратканда чарчап, кээде уйку келген учурлар кездешет. Терапевт Татьяна Романенко адам сергек болуп, уйкусун ачууга коопсуз ыкмаларды Sputnik радиосуна курган маегинде айтып берди.
Адис айдоочулар энергетикалык суусундуктарды алып ичишерин, бирок анын курамында кофеин менен кумшекер көп болгондуктан ден соолукка зыяндуу экенин эстен чыгарышарын белгилеген.
"Чарчоону, уйкуну кетирүүгө кадимки эле суу жакшы жардам берет. Аны бир аз муздагыраак ичүү сунушталат. Мындан тышкары, чай, кофе да ичсе болот, экөөндө тең кофеин бар болгондуктан организмде кислороддун жакшы айланышын шарттайт. Бул аракет борбордук нерв системасына таасир берет. Суюктуктун жардамы менен суу балансын толуктап, зат алмашууну да жакшырта алабыз. Ага азыраак шекер кошуп алса чарчаган кишиге аз убакытка болсо да энергия берет", – деп түшүндүргөн Татьяна Романенко.
Дарыгер чай, кофеден башка кээ бир азыктар да сергек болууга жардам берерин белгилеген. Мисалы, шоколад мындайда оң таасирин тийгизет, себеби курамында кофеин менен какао буурчактарынын майы бар. Глюкоза, фруктоза камтылгандыктан унаа айдап баратып уйкусу келгендер мөмө-жемиш жеп койсо да жардам берет.
"Бул жөнөкөй углеводдор дароо адамдын мээсине сигнал берип, өзүн сергек сезүүсүн жана ишке жөндөмдүүлүгүн арттырууга шарт түзөт. Ошол эле учурда кандайдыр бир нерселерди жутуу да организмди ойгото алат", – деген Романенко.
Терапевт эгер адам уйкусу катуу келип жатканын байкаса коопсуз жерге токтоп, 10-15 мүнөт чырм этип алууга кеңеш берет. Организм менен күчтөп күрөшкөндөн көрө аны аз убакытка эс алдырганда ал кайра энергия алып каларын кошумчалаган.