БИШКЕК, 10-май — Sputnik. ТЭЦтеги жарылуудан жабыркап, Түркияда дарыланып жаткан эки кыргызстандык Бишкекке алып келинди. Бул тууралуу Саламаттык сактоо министрлигинен билдиришти.
Маалыматка ылайык, бейтаптар учурда Бишкектеги Тез жардам ооруканасында. Эми алар Курортология жана калыбына келтирип дарылоочу илим-изилдөө институтуна которулмакчы.
"Учурда алардын абалы туруктуу, бирок алдыда реабилитация, андан кийин этаптуу реконструкциялоо операциялары талап кылынат", — деп жазылат билдирмеде.
Эске салсак, февралда ТЭЦтеги жарылуудан жана тик учактын кулашынан жаракат алган кыргызстандыктар президенттик борт менен Түркияга жеткирилген. Апрелдин соңунда учкуч дарыланып өлкөгө кайтып келгенин Коргоо министрлиги кабарлаган.