Мамлекет акыйкат издегендерге юридикалык жактан чыныгы, сапаттуу жардам бере аларына ишенбеген көз караш эл арасында дагы деле бар. Негизги максат — ишенимди кайтаруу. Бул тууралуу Акжол Калбеков Sputnik Кыргызстан радиосунун эфиринде маек куруп жатып билдирди.
Анын айтымында, анализ боюнча, акыркы эки жылдын ичинде мамлекет кепилдеген юридикалык жардамдын сапаты жогорулады.
"Акысыз юридикалык жардам же мамлекеттик адвокаттардын кызматы союз маалынан бери бар. Тилекке каршы, эгемендүүлүк алгандан бери сапат жагы эске алынбай калган. 2005-жылы өлкө башчынын буйругу менен Адам укуктарын коргоо жана өнүктүрүү боюнча концепция кабыл алынып, анын алкагында мамлекет тарабынан юридикалык жардам көрсөтүү жаатында Юстиция министрлигинин алдында жумушчу топ түзүлүп, 4-5 жыл иш жүргөн. Бул концепциянын ишке ашуусуна ишенбегендер да болду. Бирок ага карабастан калктын аялуу катмарынын укугун коргоо чөйрөсүндөгү процесстерди, укук колдонуу практикасын жана колдонулуп жаткан эл аралык тажрыйбаны узак изилдөө жана талдоодон кийин, 2009-жылдын 17-июлунда "Мамлекет кепилдеген юридикалык жардам жөнүндө" мыйзам кабыл алынды. Ага ылайык, акысыз юридикалык жардам консультациялык-укуктук жана квалификациялуу юридикалык түрдө көрсөтүлөт. Мыйзам 2011-жылдан баштап толугу менен күчүнө кирди. Биринчи кабыл алынган мыйзамда кылмыш иштеринде гана акысыз адвокаттар берилип келген. Сапатын көтөрүү, ишке ашыруу механизмдери дагы так каралган эмес. Уюштуруу, координациялоо маселелери, мониторинг жасоо дегендер ал документте камтылбай калган. 2013-жылы сот-укуктук реформанын алкагында бир топ кодекс, мыйзамдар кабыл алынып, ошону менен бирге мыйзамдын жаңы редакциясы иштелип чыккан. Бул мыйзам толугу менен башка мыйзамдар менен шайкеш келтирилип, 2016-жылы декабрь айында кабыл алынып, 2017-жылы күчүнө кирген. Мыйзамда координациялоо боюнча мамлекеттик мекеме түзүү каралган. 2017-жылы 31-майда Юстиция министрлигинин алдындагы Мамлекет кепилдеген юридикалык жардамды координациялоо борбору түзүлгөн. Жыл сайын адамдардын кайрылуусу көбөйүүдө. Бул бир жактан жакшы көрүнүш, себеби жарандар көбүрөөк маалымат алып жатат. Экинчи жагынан, бул эл ичинде көйгөйлүү маселелер көп экенин көрсөтүп турат. Бирок бул багытта бир эле юридикалык жардам менен чектелбей, сөзсүз укуктук маданиятты жогорулатуу багытында дагы тийиштүү чаралар көрүлүүдө. Анализ боюнча, акыркы эки жылдын ичинде мамлекет кепилдеген юридикалык жардамдын сапаты жогорулады. 2023-жылы бизге кайрылгандардын 68 пайызынын маселесин чечип бердик", — деди Калбеков.
Ал мамлекеттик адвокаттардын гонорары көбөйтүлүп, ошого жараша сапаттуу юридикалык жардам көрсөтүү талап кылынып жатканын кошумчалады.