БИШКЕК, 9-май — Sputnik. Россия Жеңиш күндү аскердик атайын операция учурунда белгилеп жатат, ал эми азыр кармаштын алдыңкы чектеринде жүргөндөр — баатырлар. Бул туурасында Россиянын президенти Владимир Путин Кызыл аянтта Улуу Жеңиштин 79 жылдыгына арналган аскердик параддын алдында айтты.
Мамлекет башчы Россия эли атайын операциянын катышуучуларынын каармандыгына, эрдигине жана чыдамдуулугуна баа берип, таазим этерин белгиледи.
"Россия өткөөл мезгилди, оор учурду баштан кечирүүдө. Анын тагдыры жана келечеги ар бирибизге байланыштуу. Жеңиш күнүндө биз бул сөздүн күчүн мурдагыдан да курчураак сезип, түшүнүп жатабыз. Эр жүрөк, акылдуу, достукту баалаган, кыйынчылыкка туруштук бере алган, ар дайым өзүнө жана өлкөсүнө ишенген муунга үмүт артабыз. Ал эми азыр кармаштын алдыңкы чектеринде жүргөндөр — баатырлар ", — деди Путин.
Кан күйгөн Улуу Ата Мекендик же Экинчи дүйнөлүк согуш
Бүгүн, 9-майда, дүйнөнүн көп аймактарында Улуу Ата Мекендик согуштагы Жеңиштин 79 жылдыгы белгиленип жатат.
Улуу Ата Мекендик согуш 1 418 күнгө созулган. 1945-жылдын 9-майында фашисттик блок өлкөлөрүнүн толук талкаланышы менен аяктаган. Андагы адам жоготууларынан жүрөк түтөйт. Согуш жылдарында СССР 26,6 миллион адамынан ажыраган. Алардын ичинен 8,7 миллиондон ашууну согуш талаасында курман болгон, 7,42 миллион адам оккупацияланган аймактарда фашисттер тарабынан атайылап жок кылынган. 4,1 миллиондон ашыгы оккупациялык режимдин катаал шарттарынан курман болгон.
Улуу Ата Мекендик согушта немецтерди жеңүү үчүн Кыргызстан аскер, азык-түлүк, керектүү болгон нерселердин бардыгын жөнөтүп турган. "Бардыгы фронт үчүн, бардыгы жеңиш үчүн" — ошол кездеги тылдагы миллиондогон балдар менен улгайгандардын урааны болгон. Кыргыз ССРинен Улуу Ата Мекендик согушка 365 миң адам катышып, 152 миңден ашууну курман болгон. Калганы ар кыл жылдары кайтып келген. 2024-жылдын 9-майына карата жалпы өлкө боюнча согуштун 40 ардагери бар.