БИШКЕК, 9-май — Sputnik. Ош шаардык милициясынын кайгуул кызматты айдоочулук күбөлүгү жок окуучуларга унаа берүүгө тыюу салынарын эскертти.
Маалыматта мектептерде 25-майда акыркы коңгуроо салтанаты болору айтылган.
"Бүтүрүүчүлөрдүн жол кырсыгына кабылуусун алдын алуу максатында ата-энелерге, унааны ижарага берген ишкерлерге окуучуларга унааны бербөө керектигин эскертебиз. Айдоого укугу жок бүтүрүүчүлөргө автоунаа берүүгө тыюу салынат. Өспүрүмдөр жаракат алган учурлар болгон. Анын ичинен кесепети оор болгон фактылар да катталган", — деп жазылат маалыматта.
Ошондой эле мас айдоочу бир жылга унаа башкаруу укугунан ажыратылары, ал эми айдоочулук күбөлүгү жок унаа башкаргандардын көлүгү убактылуу аянтчага токтотулуп 15 миң сом айып салынары кошумчаланган.