БИШКЕК, 9-май — Sputnik. Бишкектин түштүгүндөгү "Асанбай" паркынын аймагына заманбап оюн-зоок паркын куруу пландалып жатканын мэриянын маалымат кызматы кабарлады.
Билдирмеге караганда, бул парк башкача, жаңы форматта болот.
"Ал жакка жаңы аттракциондор, ыңгайлуу кабиналары бар 90 метр бийиктиктеги күн дөңгөлөк, балдар үчүн акватория салынмакчы. Ал эми зоопарк модернизацияланат", — деп айтылат маалыматта.
Долбоор "Бишкек башкы архитектура" ишканасы тарабынан иштелип жатканы кошумчаланды. Муниципалитет парктын аймагына көп кабаттуу үйлөр курулбай турганын убадалады.