БИШКЕК, 7-май — Sputnik. Владимир Путиндин инаугурациясына катышуу боюнча маселе Евробиримдикте ажырым жаратты. Бул тууралуу Spiegel журналына шилтеме кылып, РИА Новости билдирди.
Маалыматка ылайык, Франция, Венгрия жана Словакия инаугурацияга өз өкүлдөрүн жиберүүнү көздөп, ал эми Германия жана Евробиримдиктин башка өлкөлөрү салтанатка катышууну туура эмес деп эсептөөдө.
Ошондой эле иш-чарага Евробиримдиктин Москвадагы расмий өкүлү да катышпай турганы белгиленген.
Европа дипломатиясынын башчысы Жозеп Боррель Евробиримдиктин салтанатка катышуусуна каршы чыкканы менен бул пикирге кошулбагандар да болду. Алардын пикиринде, аземге катышуудан баш тартуу Россияга "келечекте көптөгөн дипломатиялык эрежелерди көңүл сыртында калтырууга" себеп болушу ыктымал.
Салтанатка өкмөт мүчөлөрү, Мамдуманын депутаттары жана сенаторлор, президенттик аппараттын жетекчилери, Конституциялык соттун судьялары, дипломатиялык корпус жана башка мамлекеттик кызматкерлер, ошондой эле спорт жана шоу-бизнес жылдыздары катышат.
Россиянын президенти Владимир Путиндин инаугурациясы Кремлде өтүп жатат. Бул — Путиндин саясий карьерасындагы бешинчи инаугурация аземи. Ал 2030-жылга чейин президенттик кызматты ээлейт. Россияда президенттик шайлоо 15-17-март аралыгында өтүп, анын жыйынтыгы боюнча Владимир Путин добуштардын 87,28 пайызын алган.
Sputnuk Кыргызстан инаугурация аземинен түз алып берүүдө.