Президент Садыр Жапаров иш сапары менен Россияга учуп кетти. Бул тууралуу мамлекет башчынын маалымат кызматы билдирди.Иш сапардын алкагында өлкө башчы Москвада ЕАЭБдин юбилейлик саммитине жана Улуу Ата Мекендик согуштагы Жеңиштин 79 жылдыгын белгилөө боюнча салтанаттуу иш-чараларга катышары белгиленген.Олко башчыны министрлер кабинетинин төрагасынын биринчи орун басары Адылбек Касымалиев; тышкы иштер министри Жээнбек Кулубаев; президенттин администрациясынын тышкы саясат бөлүмүнүн башчысы Муратбек Азымбакиев; Кыргызстандын Россиядагы элчиси Гульнара-Клара Самат; экономика жана коммерция министри Данияр Амангелдиев; Бишкек шаарынын мэри Айбек Жунушалиев коштоп кетти.
Министрлер кабинетинин төрагасы Акылбек Жапаров Ысык-Көл облусуна болгон жумушчу сапарынын алкагында "Кумтөр голд компани" жабык акционердик коомунун ишмердүүлүгү менен таанышты. Бул тууралуу өкмөттүн маалымат кызматынан билдиришти.Алгач Жапаров Кумтөрдүн жетекчилиги менен жыйын өткөрүп, андан кийин жаңы экскаваторлорду куроо жана май куюучу бекеттердин абалы менен таанышканы айтылды. Ошондой эле учурда кендин ишин үзгүлтүккө учуратпаш үчүн 800дөн ашуун ар кандай техника, транспорттук каражат жана жабдык колдонулары белгиленди. "Минкаб төрагасы Кумтөрдүн негизги карьерине барды. Февралда Кумтөрдө жер астынан алтын казып алууну баштоого старт берилген. Бул өз кезегинде 115 тоннага жакын алтын чыгарууга мүмкүндүк берет. 2026-жылдан тартып кендин калдык сактоочу жайындагы руда калдыктарынан алтын бөлүп алууну баштоо пландалып жатат. Алдын ала эсептөөлөр боюнча, кошумча дагы 120 тонна алтын алынары божомолдонууда", — деп жазылган маалыматта. Жапаров Кумтөр мамлекетке өткөндөн кийин бир топ өзгөрүүлөр болуп жатканын белгиледи. Маселен, өткөн жылы өлкөнүн бюджетине салык, социалдык төлөм жана башка төлөмдөр түрүндө 17,2 миллиард сом түшкөн. Жалпы кызматкерлердин саны 3000ден ашуун болсо, анын 99,9 пайызын жергиликтүү адистер түзөт.
Бишкектин "Тазалык" ишканасы жолдорду жууп-тазалоочу төрт техника сатып алды. Бул тууралуу муниципалитеттен билдиришти.Ишкананын кызматкерлери Масалиев жана Садырбаев көчөлөрүнүн кесилишиндеги бордюрду, андан кийин Ахунбаев көчөсүндөгү жол сызыктарды жууп, мэр Айбек Жунушалиев менен орун басары Рамиз Алиевге техниканын ишин көрсөтүштү. "Атайын унаалар жолдун бордюрларын тазалоого катышкан "Тазалыктын" кызматкерлеринин коопсуздугун камсыздайт", — деп жазылган маалыматта.Жакынкы эки-үч айда мэрия тарабынан 100дөн ашык атайын техника сатып алуу пландалып жатканы кошумчаланды.
Батыш өлкөлөрү кызматташуу жолдорун издеп, Россиянын өнүгүүсүнө тоскоол болбосо Москва алар менен диалогдон баш тартпайт. Бул туурасында Россия президенти Владимир Путин инаугурация учурунда айтты.Путиндин айтымында, ЕАЭБдеги өнөктөштөрү жана башка суверендүү өнүктүрүү борборлору менен бирге Россия көп полярдуу дүйнөлүк тартипти калыптандыруу боюнча ишти улантат. Ал Россия ишенимдүү жана чыныгы өнөктөш катары көргөн бардык өлкөлөр менен ынак мамилени чыңдоого ачык экенин белгиледи.