БИШКЕК, 6-май — Sputnik. Президент Садыр Жапаров Ош облусун жана Ош шаарын өнүктүрүү пландары менен таанышты. Бул тууралуу өлкө башчынын маалымат кызматы билдирди.
Мамлекет жетекчисине Ош облусуна болгон жумушчу сапарынын алкагында өткөн кеңешмеде аймакты таза суу менен камсыздоо, жол инфраструктурасын жакшыртуу, социалдык объектилерди куруу жана реконструкциялоо, көп батирлүү ипотекалык үйлөрдү тургузуу, ошондой эле өндүрүштүк ишканаларды ишке киргизүү боюнча долбоорлордун ишке ашырылышы тууралуу маалымат берилди.
Муну менен катар президент Кара-Суу районундагы "Туратали" базарын мамлекеттин менчигине кайтаруу боюнча аткарылган иштер тууралуу да кабар алды.
Жапаров тапшырмалардын аткарылышын катуу көзөмөлдөөнүн маанилүүлүгүн өзгөчө белгилеп, президенттин администрациясына отчеттук маалыматтарды үзгүлтүксүз берип туруу зарылдыгын эскертти.