Сузакта Porter сүзүп кеткен окуучулардын бирине Бишкекте операция жасалып, ага саламаттык сактоо министри Алымкадыр Бейшеналиев катышты. Бул тууралуу ведомствонун маалымат кызматы кабарлады. Билдирмеге караганда, 9 жаштагы кыздын баш сөөгү сынып кеткен. "Кызга операция ийгиликтүү жасалып, азыр абалы туруктуу. Башка жабыркагандардын баары дарыланып, компьютердик томографиядан, айрымдары лабораториялык изилдөөлөрдөн өттү. Кээ бирине көрсөтмөгө жараша операция жасалат", — деп жазылат кабарда. Жалал-Абаддагы ооруканаларда 9 бала дарыланып жатканы, бардыгынын абалы туруктуу экени кошумчаланды. Биринин абалы жакшырып, үйүнө чыгарылган.
Борбордук шайлоо комиссиясы Баткен бир мандаттуу шайлоо округунан Бактияр Калпаевди Жогорку Кеңештин шайланган депутаты деп тааныды. №2 Баткен шайлоо округу боюнча Жогорку Кеңештин депутаттыгына 10 талапкер катталган. Бактыяр Калпаев Баткен шайлоо округу боюнча өткөн шайлоодо 41,51% добуш алган. Бул округда мөөнөтүнөн мурда шайлоону даярдоо жана өткөрүү учурунда 8 арыз жана даттануу түшкөн. БШК даттануулар каралганын жана алар боюнча чечим кабыл алынып, мыйзамдарга ылайык жазуу жүзүндөгү жооптор берилгенин билдирди. 28-апрелде Ош, Баткен, Кара-Суу шайлоо округдарынан бир катар депутат мандатын мөөнөтүнөн мурда тапшырганы үчүн кайра шайлоо өттү.
УКМК төрагасы Камчыбек Ташиев түнкү клуб ээлерине жана мындай жайларды иштеткендерге кайрылып, социалдык тармактагы баракчасы аркылуу эскертүү берди. Ал акыркы убакта өткөрүлгөн рейддерде түнкү клубдардан баңгизаттар, көбүнчө синтетикалык кошулмалар бар каражаттар табылганын белгилеген. "Жаштардын саламаттыгына кам көрүү багытындагы иштерди дагы да күчөтүү максатында түнкү клубдарды иштеткендерге, алардын ээлерине да эскертүү. Баңгизаттардын кайсы түрү болбосун клубдарга алып кирүүгө, ал жакта таратылып, сатылуусуна жол бербегиле. Эгерде ошондой учурлар катталса мыйзам чегинде жоопко тартыласыздар", — деген Ташиев.
Ош шаарына Москвадан Кремлдин дубалындагы Белгисиз жоокердин мүрзөсүндөгү Өчпөс оттун бир бөлүгү алып келингенин мэриянын маалымат кызматы кабарлады. Билдирмеге караганда, аны 4-май таңга маал Россия президентинин ишенимдүү адамы, актер Михаил Мамаев, "Элдик фронт" кыймылынын Красноярск крайындагы облустук аткаруу комитетинин башчысы Оксана Ларионова жеткирген. Конокторду Ош мэриясынын, Россотрудничествонун жана Россиянын Башкы консулдугунун өкүлдөрү тосуп алган."Эскерүү оту" эл аралык акциясынын алкагында митинг-реквием өтүп, от жагылып, андан соң Түбөлүк оттун бөлүкчөсү Кыргызстандын башка шаарларына өткөрүлүп берилмекчи", — деп жазылат маалыматта. Бул иш-чара быйыл Ош шаарында экинчи жолу өтүп жатканы кошумчаланды.
Грек-рим күрөшү боюнча 60 килограммга чейинки салмак ченинде Азиянын үч жолку чемпиону кыргызстандык балбан Жоламан Шаршенбеков дүйнөлүк рейтингде 1-орунду сактап калды. Дүйнөлүк күрөш уюмунун жаңыланган рейтинги Бишкекте өткөн Азия чемпионатынын жыйынтыгы боюнча түзүлдү. Жоламан Шаршенбеков Бишкекте өткөн Азия чемпионатынын финалында жапониялык балбан Кайто Инаба менен күч сынашып, атаандашын 11:0 эсебинде мөөнөтүнөн мурда утуп, Азия чемпионатынын үч жолку чемпиону болгон.