Сузакта "Портер" жүрүп кетип, андан жабыркаган балдар Бишкекке алып келинди. Бул тууралуу Саламаттык сактоо министрлиги маалымдады. Билдирмеге ылайык, алар Шаардык балдар клиникалык тез жардам ооруканасына жаткырылды. Буга чейин президент Садыр Жапаров жабыркагандарга жогорку квалификациялуу медициналык жардам көрсөтүү максатында балдарды Бишкекке алдыруу тапшырмасын берген. Алар борбор шаарга атайын борт менен алып келинген. Эске сала кетсек, кечээ, 2-май күнү, саат 14:00дөр чамасында Катмы жайлоосунда манас айтып жаткан балдарды Porter унаасы коюп кеткен. 48 жаштагы айдоочу көрсөтмөсүндө балдарга бекер балмуздак таратканы барганын, Жерге-Тал айылдык мектебинин директорунан таттууну кайсы жакка жеткирүү керек экенин сурап телефон чалып жатканда машинасы ылдыйга түшүп кеткенин, артынан токтотконго жетишпей калганын айткан.
Билим берүү жана илим министрлиги “Акылман” президенттик лицейине кабыл алуунун жаңы талаптары тууралуу айтып берди. Билим жайына кабыл алуу конкурстук негизде жүргүзүлүп, мектепте 6-8-класста “жакшы” жана “эң жакшы” баага окуган окуучулар катыша алат. Тандоонун жыйынтыгында лицейге 6-класстар арасында эң жогорку балл алган 72 окуучу, 8-класстардын ичинен 48 окуучу кабыл алынат. Сынактын алкагындагы тестирлөөлөр 11-майда башталып жалпы үч тур менен өткөрүлөт. Маалымат алуу үчүн Telegram тиркемесиндеги “Акылман” кабыл алуу-2024” тобуна кошулуу керек же Билим берүү министрлигинин сайтына баш багуу зарыл.
Жеңиш күнүнө карата борбордо “Георгий тасмасы” акциясы башталды. Бул тууралуу Россиянын Бишкектеги илим жана маданият борбору ("Русский дом") билдирди. Маалыматка ылайык, акция жыл сайын өткөрүлүп келет. Дүйнөдөгү миллиондогон адамдар мекенди коргоодо эрдик көрсөткөндөрдүн урматына кийимдерине лента тагып келишет. "Русский дом" шаардыктар лентаны акысыз алса болорун, бир колго 20 даанасы берилерин айтты. Ал эми 20дан көп тасма алууну каалаган уюмдар билдирме толтурушу керек. Лентаны 8-майга чейин күн сайын саат 9:00дөн 18:00гө чейин Эркиндик проспекти, 2/1 дарегинен келип алып кетүүгө болот.
Тиш дарыгери Алексей Антипенко Sputnik радиосунда адам тишин дарылатуунун алдында кандай эрежелерди сакташы керектигин түшүндүрүп берди. Айтымында, бейтаптын ага карата туура даярдыгы дарылоонун сапатына таасир берет. "Адегенде ойлорду иретке келтирүү зарыл. Тынчсыздануудан арылып, тиш дарылоо коопсуз жана натыйжалуу процедура экенине ишенүү керек. Мындан тышкары, процедуралар дайыма ооруну сездирбөөчү дары сайылгандан кийин аткарыларын эстен чыгарбоо зарыл. Туш келген тиш дарыгерине баргандан көрө тааныштар сунуштаган стоматологго барган оң", – деп белгилеген Алексей Антипенко. Адис эртең тиш дарыгерге барам деген түнү жакшылап уктап эс алуу зарыл экенин айткан. Ошондой эле адис тиш дарыгерине барардын алдында жакшылап тамактанууну сунуштайт. Айтымында, адам ачка болсо процедура учурунда шилекей көп бөлүнүп чыгат. Мындан тышкары, тиш дарылатуунун алдында да, андан кийин да дароо алкоголдук ичимдиктерди ичүүгө болбой турганын түшүндүргөн.