БИШКЕК, 3-май — Sputnik. РФ ТИМинин расмий өкүлү Мария Захарова Британиянын тышкы иштер министри Дэвид Кэмерондун киевдик режимди Батыш "тойгуздурган" "Аль-Каида"* тобуна салыштырып, Киевдин РФ аймагына британиялык курал менен сокку урууга "укуктуулугу" тууралуу айткандарына жооп берди. Бул тууралуу РИА Новости жазды.
Буга чейин Рейтер агенттиги Кэмерондун маегин жарыялаган. Анда ал Украина Лондон тарабынан жеткирилген курал менен Россиянын аймагына сокку урууга укуктуу деген пикирин айткан. Көп өтпөй жаңылык өчүрүлүп, бир нече убакыттан кийин кайрадан ошол эле калыбында жарыяланган.
"Кезегинде Батыш тойгузган "Аль-Каида" террорчулары жасагандай эле киевдик режим британиялык курал менен Британиянын аймагына сокку уруусуна даярдана беришсин", — деген Захарова РИА Новостиге.
Мурдараак Улуу Британиянын коргонуу штабынын башчысы, адмирал Тони Радакин Financial Times гезитине курган маегинде украиналык аскерлер Россия аймагына сокку уруу үчүн аларга АКШ тарабынан берилген ыраакка жүрө турган куралдарды, анын ичинде ATACMS ракеталарын колдонот деп ишенерин айткан. Ал Украина Россияга чабуулдарын көбөйтөт деп ниеттенип жатканын боолгологон.
Ошондой эле буга чейин АКШ Россиянын курамына кирген Крым, ДЭР, ЛЭР, Херсон жана Запорожск облустарында Украинанын Куралдуу күчтөрү ATACMS ыкчам-тактикалык ракеталарын колдоно ала турган "суверендүү украин аймактары" деп эсептей тургандыгы маалымдалган. Өз кезинде РФ президентинин маалымат катчысы Дмитрий Песков АКШнын Украинадагы жаңжалга түздөн-түз аралашып жатканын, бирок бул атайын операциялардын максатын өзгөртө албай турганын айткан.
Улуу Британиянын премьер-министри Риши Сунак Польшага болгон иш сапарында Киевге кошумча 500 миллион фунт стерлингдик аскердик жардам бөлүнгөнүн айткан. Буга чейин Даунинг-стритте Британия Украинага аскердик жабдыктардын ири топтомун, анын ичинде Storm Shadow алыс аралыкка учуучу ракеталарды берери да маалымдалган.
Россия Украинаны куралдандыруу абалды жөнгө салууга тоскоолдук жаратып, конфликтиге НАТО өлкөлөрүн түздөн-түз кийлигиштирип "от менен ойноп" жатат деп эсептейт. РФ ТИМ башчысы Сергей Лавров Украинаны куралдандыруу үчүн берилген ар бир жүк Россиянын максаттуу бутасы болорун айткан. Ал билдиргендей, АКШ жана НАТО Украинаны курал-жарак менен камсыздоо менен жаңжалга түздөн-түз катышкандан тышкары, Улуу Британия, Германия, Италия жана башка өлкөлөрдө адистерди даярдоо менен да алек болушууда. Кремль Батыш тараптын Украинаны курал менен камсыздоосу сүйлөшүү жолуна алып келбей турганын, тескерисинче, мындан терс натыйжа чыгарын айткан.
* Кыргызстан, Россия жана башка бир катар өлкөлөрдө тыюу салынган террордук уюм.