БИШКЕК, 2-май — Sputnik. Жалал-Абад облусунун Сузак районунда Porter үлгүсүндөгү жүк ташуучу унаа иш-чарага келген 29 баланы коюп кетти. Бул тууралуу Саламаттык сактоо министрлигинин маалымат кызматы билдирди.
Кырсык бүгүн, 2-майда, саат 13:30дар чамасында болгон. Алдын ала маалымат боюнча, унаада балмуздак сатылып жаткан. Ал кокусунан жүрүп кетип, балдарды аралап кеткен.
Саламаттык сактоо министрлиги кырсыктан 9 жаштан 16 жашка чейинки балдар жабыркаганын билдирди.
Учурда ооруканага жалпысынан 18 бала (абалдары орто оор) жаткырылып, алардын жетөө Жалал-Абад облустук балдар ооруканасынын жандандыруу бөлүмүнө түшкөн (алардын ичинен үчөө оор абалда). Калган 11 жеткинчекке жеринен жардам көрсөтүлүп, амбулатордук дарыланууга жөнөтүлгөн.
"Окуя министр Алымкадыр Бейшеналиевдин жеке көзөмөлүндө. Тийиштүү бардык жетекчилерге сапаттуу медициналык жардам берүү, ошону менен бирге керектелүүчү дары-дармек жана медициналык буюмдар менен камсыз кылуу тапшырылды", — деп билдирди ведомство.