"Бизде атайын мыйзамдын негизинде Медиация институту өз ишмердүүлүгүн 2017-жылдан бери жүргүзүп келет. Бул аралыкта аталган институт алгылыктуу көрсөткүчтөргө жете алган жок. Анткени улуттук өзгөчөлүктөр эске алынган эмес. Биз учурда ар кайсы мамлекеттердин медиация уюмдарынын иштөө тажрыйбалары менен таанышып келдик. Өзүбүзгө ылайыктуусу Түркия мамлекетинин системасы болуп турат. Ушул системаны биздин улуттук баалуулуктарга ыңгайлаштырып киргизүүнү пландоодобуз. Учурда аталган тармакты реформалоо максатында мыйзам долбоору жазылып жатат. Аны менен катар Жарандык кодекске, Жарандык-процессуалдык кодекске, Административдик-процессуалдык кодекске, мамлекет кепилдеген юридикалык көмөк мыйзамына, Эмгек кодексине жана башка тиешелүү мыйзамдарга өзгөртүүлөр кирет. Бул мыйзам долбоорлору бири-бирине шайкеш келиши үчүн пакети менен сунушталат. Мыйзам колдоо тапса биз келечектеги медиаторлорду атайын окуудан өткөрүп баштайбыз. Жашы 25тен жогору, Кыргызстандын жараны болгон, жогорку билими бар, акыл-эси ордунда бардык эле каалоочулар медиатор боло алат. Сөзсүз эле юридикалык билим талап кылынбайт", — деди Сыдыков.