БИШКЕК, 1-май — Sputnik. Мамлекеттердин чыныгы суверенитетин камсыз кылуу үчүн көп полярдуулукка өтүү керек. Бул тууралуу Кыргызстандын Коопсуздук кеңешинин катчысы Марат Иманкулов Санкт-Петербургда өткөн коопсуздук маселелерин тейлеген жогорку өкүлдөрдүн 12-жыйынынын жйынтыгы менен "Кабар" агенттигине берген маегинде билдирди.
Ал бир полярдуу дүйнө өз баалуулуктарын башка өлкөлөргө таңуулап, элдердин маданиятына жана салтына шек келтирерин айткан.
"Биз мамлекеттерди этникалык жактан бөлүп-жаруу ыкмасын, маданий негизинен бөлүп салгандан кийин алар эч нерсеге жарабай каларын көрдүк", — деген Иманкулов.
Ушул эле маекте Коопсуздук кеңешинин катчысы Борбор Азия үчүн башкы коркунучтарды санап берген. Алар:
Улут аралык чыр-чатак аркылуу өлкөлөрдү бөлүп-жарууга кызыкдар күчтөр бар. Кыргызстанда 1990-жылы жана 2010-жылы болгон окуялар ага мисал. Бул жарандык согуш коркунучун жаратат. Биз ага жол бербешибиз керек;
Диний аралык чыр-чатак. Бөлүү жана башкаруу принцибине ылайык, өз баалуулуктарын таңуулоо. Бул идеология. Кеп баалуулуктарды жок кылуу жөнүндө болуп жатат;
Глобализм өкүлдөрү Экинчи дүйнөлүк согуштун жыйынтыктарын кайра жазууга далалат кылууда. Мунун арты менен жаңы согуш башталып кетиши мүмкүн.
Иманкулов Санкт-Петербургдагы коопсуздук боюнча өткөн конференцияда көпчүлүк өзөктүк доордо бул нерсе улана турган болсо цивилизациянын талкалануу коркунучу жараларын айтып, саясат таануучулар, эксперттер кооптонуп жатканын кошумчалаган.
"Бардыгы Европада да, Жакынкы Чыгышта да эл аралык кырдаал начарлаганын айтып жатат. Чыр-чатактар тынчтык жолу менен чечилбесе алгач аймактык, кийин глобалдык согуш башталып кетүү коркунучу сакталып турат. Аны токтотуу кыйын болуп калат. Ири державалардын лидерлери кырдаалдын мындай нукка түшүп кетүүсүнө жол бербейт деп ишенем", — деген Иманкулов.
Эске салсак, Санкт-Петербургда коопсуздук маселелерин тейлеген жогорку өкүлдөрдүн 12-жыйынында эл аралык коопсуздукту, тынчтыкты жана туруктуулукту сактоодо дүйнө мамлекеттеринин улуттук өзгөчөлүгүн жана салттуу баалуулуктарын сактоого байланышкан маселелер козголгон.