БИШКЕК, 30-апр — Sputnik. TikTok социалдык тармагы Евробиримдиктин алкагында чектөөгө алынышы мүмкүн. Бул туурасында Еврокомиссиянын башчысы Урсула фон дер Ляйендин айтканын РИА Новости Politico басылмасына таянып билдирди.
Фон дер Ляйен Еврокомиссия кызматкерлеринин иш телефондоруна TikTok орнотууга тыюу салган дүйнөдөгү биринчи уюм болуп калганын айтты. Өткөн аптада Европа комиссиясы тарабынан кезектеги эскертүү болгондон кийин TikTok колдонуучулардын акча табуу программасын токтоткон.
Буга чейин Европа комиссиясы ЕБдеги санарип кызматтар боюнча жаңы мыйзамга ылайык, TikTok ээлерине TikTok Lite тиркемелеринин тобокелдиктерине баа берген докладга сурам жөнөткөн. Анда "лайктар" үчүн сый акы караган функция да камтылган.
Еврокомиссия мындай тобокелдиктерге баа берүү компания тарабынан жүргүзүлгөн эмес деп шектенип, ал эми сый акы берген ыкмасы колдонуучулардын, алардын ичинен балдардын ага байланып, көнүп калуусун шарттайт деп түйшөлүүдө. Тагыраагы, ЕБ TikTok Lite берген тапшырманы аткарып жана ал посттун көп каралганы, арбын "лайк" алганы жана көп дос чакырганы үчүн сый акы берген программадан чочулап жатат.
АКШ Конгрессинин Өкүлдөр палатасы да буга чейин TikTok ээсин, аны иштеп чыккан ByteDance компаниясын америкалык бизнести сатууга мажбурлай турган мыйзам долбоорун кабыл алган. Алар мындай кадамга бөгөт коюу коркунучу жаралганы үчүн барары айтылган.