БИШКЕК, 30-апр. — Sputnik. Бишкекте "Дом Москвы" маданий-ишкерлик борборунун курулушу каралды. Бул тууралуу муниципалитеттен билдиришти.
Маалыматка ылайык, Бишкек мэри Айбек Жунушалиев менен Москва шаарынын тышкы экономикалык байланыштар департаментинин башчысы Сергей Черёмин менен жолукту.
Анда эки калаанын ортосунда 2024-2027-жылдарга кызматташуу программасына кол коюлду.
"Бул программанын алкагында соода-экономикалык мамилелер, жол-транспорт инфраструктурасы, шаар куруу, борбордун аймактарын көрктөндүрүү, билим берүү жана илим, саламаттык сактоо, маданият, спорт, калкты социалдык жактан коргоо жаатында тыгыз кызматташуу жана башкалар ишке ашырылат", — деп айтылат маалыматта.
Ошондой эле "Дом Москвы" маданий-ишкерлик борборуна имарат куруу маселеси да талкууланганы кошумчаланды.