Россия менен Кыргызстандын парламенттер аралык комиссиясынын жыйыны өттү Анда парламенттер аралык алаканы өнүктүрүү, анын ичинде евразиялык интеграциялык бирикмелердин алкагында маданият, билим берүү, энергетика, айыл чарба, айлана-чөйрөнү коргоо жана миграциялык мыйзамдар талкууланды. Жыйындын катышуучулары Жеңиштин 80 жылдыгын майрамдоого даярдык көрүүгө өзгөчө көңүл бурушту. Ошондой эле кыргыз делегациясынын мектеп окуучулары үчүн “Эстелик поезди” маданий-агартуу долбооруна жана биринчи жайкы “Дүйнөлүк достук оюндары” спорттук кыймылына катышуусу талкууланды.
Улуттук банк акыркы убактарда телефон аркылуу банктардын атынан чалып элди алдаган шылуундар көбөйүп жатканын эскертти. Адатта алар өзүн Улуттук банктын же коммерциялык банктардын кызматкери катары тааныштырып, ар кандай шылтоо менен адамдын жеке маалыматын, тагыраагы, банктык картанын реквизиттерин, CVV/CVC коддору тууралуу маалымат берүүнү суранат. "Улуттук банк тарабынан жарандардан эч кандай жеке жана купуя маалыматтар талап кылынбай турганын эскертебиз. Ошондой эле башкы банкта жарандарга эсеп ачылбайт, жеке адамдар тейленбейт жана калк менен акчалай эсептешүүлөр жүргүзүлбөйт", — деп айтылат маалыматта. Башкы банк ушул себептерден улам шылуундардан сак болууну жана аларга жеке маалыматты бербөөнү өтүнөт. Ошондой эле текшерилбеген белгисиз шилтемелерге кирип, ал жакка жеке маалыматтарды жана картанын реквизиттерин жазууга болбойт.
Кыргызстан Ислам өнүктүрүү банкы менен 79 млн долларга келишим түздү “Шариат стандарты боюнча жеткиликтүү турак жайды каржылоо” долбоору миңдеген муктаж үй-бүлөлөрдү ипотека аркылуу батир менен камсыз кыларын өкмөт башчынын биринчи орун басары Адылбек Касымалиев билдирди. Ал Сауд Арабияда банктын президенти Мухаммед Сулайман Аль-Жассир менен жолукту. Касымалиев аны Камбар-Ата-1 ГЭСинин курулушунун долбоору менен тааныштырды. Ислам өнүктүрүү банктын жетекчиси курулушту каржылоого катышууну карап чыгарын айтты.
Өлкөдө майдын этегинде алгачкы жолу 15 адамдын боорун, төрт кишинин чучугун алмаштыруу пландалууда. Операциялар президенттин демөөрчүлүк фондунан каржыланат. Башкача айтканда, бейтап донорду өзү таап, операцияга кеткен чыгымды президент төлөйт. Боорду алмаштыруу чет өлкөлөрдө 55 миң доллардан 80 миңге, чучук алмаштыруу 130 миң доллардан 160 миңге чейин жетет. Ошондой эле министр Жапаровдун тапшырмасы менен өлкөдө 10дон ашык бейтаптын бөйрөгү алмаштырылып, чыгымын мамлекет төлөгөнүн белгилеген.
Кечээ Бишкекте Улуу Ата Мекендик согушта курман болгондорду эскерүү болуп, Ыйык Жекшемби кафедралык чиркөөсүндө жоокерлердин элесине атайын жөрөлгөлөр жасалды Аны Бишкектин жана Кыргызстандын епискобу православдык майрамга карата уюштурулган иш-чарадан кийин өткөрдү. Ленинград курчоосунда калгандардын Кыргызстандагы коомчулугу бул эскерүүнү жыл сайын уюштуруп келет
1-майдан тартып Бишкектеги фонтандар иштеп баштайт. Мэриянын маалыматына караганда, учурда фонтан сезонун ачууга да