БИШКЕК, 26-апр. — Sputnik. Вашингтон Борбордук жана Түштүк Азиядагы позицияларын калыбына келтирүү аракеттерин күчөттү. Бул тууралуу Россиянын коргоо министри Сергей Шойгу Астанада өтүп жаткан ШКУга мүчө өлкөлөрдүн коргоо ведомстволорунун жетекчилеринин жыйынында билдирди.
Анын айтымында, Афганстандагы радикалдык террордук топтор Борбор Азияга коркунуч туудурууда. Ошондой эле министр аталган өлкөдөгү кырдаал татаал жана террорчулук менен экстремизмдин жайылышынын булагы болуп саналарын белгиледи.
"Вашингтон Афганстандан аскери чыгарылгандан кийин Борбордук жана Түштүк Азиядагы жоголгон позициясын калыбына келтирүү боюнча аракеттерди күчөттү. Жыйынга катышып жаткандардын баары эле аймакта АКШнын жана анын союздаштарынын аскердик инфраструктурасын жайгаштырууга жол берилбешин колдойт деп ойлойм. Мындай ниет ШКУ мейкиндигиндеги туруктуулукка коркунуч катары каралышы керек", — деди Шойгу.
Ошондой эле ал Россияга жана анын өнөктөштөрүнө карата НАТО менен Евробиримдиктин конфронтациялык курсу ШКУ мейкиндигиндеги жана бүтүндөй дүйнөдөгү кырдаалга терс таасирин тийгизип жатканын кошумчалады.