БИШКЕК, 26-апр. — Sputnik. Өлкөдө көп балалуу үй-бүлө түшүнүгүн киргизүү сунушталууда, ага төрт жана андан көп балалуулар кирет. Тиешелүү мыйзам долбоорун Жогорку Кеңештин депутаты Нуржигит Кадырбеков демилгеледи.
Салыштырма таблицада көрсөтүлгөндөй, азыркы мыйзамда көп балалуу эне түшүнүгү — беш же андан ашык уул-кызды төрөп, тарбиялагандар.
"Бул түшүнүктү киргизүү көп балалуу үй-бүлөлөргө министрлер кабинети аныктаган тартипте кошумча социалдык жеңилдиктерди алууга мүмкүнчүлүк берет", — деп жазылган анын негиздемесинде.
Ошондой эле Казакстан, Өзбекстанда бул категорияга төрттөн ашык балалуулар (соцкепилдиктер берилет), Россияда регионго жараша үчтөн ашык чүрпөсү барлар кирери белгиленген.