БИШКЕК, 26-апр. — Sputnik. Саясатчы Адахан Мадумаров камактан бошотулду.
Адвокат Кубанычбек Тумановдун айтымында, ага чыккан өкүм күчүнө кирип, эми саясатчы бошотулушу керек.
Мадумаров соттун өкүмүнө даттанарын билдирди.
Буга чейин Биринчи май райондук соту Мадумаровду Кылмыш-жаза кодексинин 209 ("Алдамчылык") жана 338инчи ("Бийликтен аша чабуу") беренелери боюнча күнөөлүү деп таап, бирок иштин мөөнөтү эскирип кеткенине байланыштуу жазадан бошоткон.
Ошол эле учурда саясатчы өкүм күчүнө киргенге чейин камакта калтырылган.
Мадумаров былтыр сентябрда кармалган. Анда эл өкүлү мамлекеттик чыккынчылыкка айыпталган болчу. Анткен менен чоо-жайы ачыкталбай келет. Бирок өзүнүн айтымында, анын кармалышы кыргыз-тажик чек арасындагы талаштуу Төрт-Көчө тилкесине байланыштуу. 2009-жылы Мадумаров Коопсуздук кеңештин катчысы болуп турганда Кыргызстан аталган жерди тажик тараптан 49 жылга ижарага алуусу каралган протоколго кол койгону айтылып келет. Кыргызстан бул документти тааныган эмес.