Президент Садыр Жапаров электромобилдерге жашыл номер, ал эми анын ээлерине жеңилдиктерди берүү боюнча мыйзамга кол койду. Мамлекет башчынын маалымат кызматы алар "Айлана-чөйрөнү коргоо жөнүндө", "Жол кыймылы жөнүндө" мыйзамдарына өзгөртүүлөрдү киргизүү жөнүндөгү документтер экенин билдирди.Анда электр кыймылдаткыч менен жүргөн транспорт каражаттарын пайдаланууда жеңилдиктерди берүү жана аларды заряддоо инфраструктурасын түзүү каралган. Ошондой эле мамлекеттик каттоодо электромобилдерге атайын жашыл мамлекеттик каттоо белгилерин берүү киргизилген. Бул мыйзам Жогорку Кеңеш тарабынан 14-мартта кабыл алынып, жеңилдиктер каралган.автоунааны каттоо акысын, салыгын төмөндөтүү; жол эрежесин бузууга салынган айыпты 50 пайызга кыскартуу; машинанын алдыңкы эшиктеринин айнектерин караңгылатууга уруксат алуу акысын арзандатуу; автоунаа токтотуучу жайларды арзандатуу жана башка бонустар каралган.**Министрлер кабинетинин төрагасы Акылбек Жапаров президент Садыр Жапаровго кызматтык милдетин так аткарбаган бир катар мамлекеттик органдардын жетекчилерине сөгүш жарыялоону сунуштай турганын өкмөттөн билдиришти.Жазаланчулардын арасында санариптик өнүктүрүү министри Нурия Кутнаева, транспорт министри Тилек Текебаев, маданият министри Алтынбек Максутов жана президенттин Ош облусундагы өкүлү Элчибек Жантаев бар. Булардан тышкары, Санариптик өнүктүрүү министрлигинин, Жаратылыш ресурстары жана Саламаттык сактоо министрликтеринин башчыларынын орун басарлары да сөгүш алмакчы.Ошондой эле ТИМ башчысы Жээнбек Кулубаев менен Улуттук инвестиция агенттигинин директору Талантбек Имановго эскертүү берүү сунушталды.
Өлкө боюнча 20-апрелден 23-апрелге чейин 67 ирет сел жүргөнү катталды. Бул тууралуу Жогорку Кеңештин жыйынында өзгөчө кырдаалдар министринин орун басары Урматбек Шамырканов билдирди.Анын айтымында, Ош облусунда 29, Жалал-Абад облусунда 18, Баткен облусунда 10, Талас облусунда 4, Чүй облусунда 4, Ош шаарында эки учур болгон."Сел 1 092 кожолукту каптап, анын ичинен 264 турак жайдын жер төлөсүнө суу кирген. Алдын ала маалымат боюнча, 253 үй канааттандырарлык абалда, тогуз үй капиталдык оңдоого муктаж, эки үй жараксыз болуп калган. Жети социалдык объектини суу каптап, бирөө жараксыз абалга келген. Мындан тышкары, чарбалык курулуштар, көпүрөлөр, арыктар, жолдор, сел өтүүчү каналдарды суу каптаган. 300 кожолук эвакуацияланып, жети жылкы, үч уй, жети кой сууга агып кеткен", — деди Шамырканов.Ошондой эле ал сел жүргөн жерлерде Жарандык коргонуу комиссиясы иш алып барып жатканын белгиледи. Мындан тышкары, селдин кесепеттерин жоюуга ӨКМ тарабынан 23 техника, 685 куткаруучу жана 29 суу сордуруучу насос тартылганын кошумчалады.
ЕАЭБдин алкагында энергиянын кайра жаралуучу булактарын өнүктүрүү талкууланганын ЕЭКтин энергетика жана инфраструктура министри Арзыбек Кожошев билдирди.Уюмдун отун-энергетикалык комплексин өнүктүрүүнүн келечегине арналган тегерек столдо декарбонизациялоо жана союзга мүчө өлкөлөрдүн экономикасынын энергетикалык натыйжалуулугун жогорулатуу маселелери каралган.Тегерек столдун жыйынтыгында биргелешкен билдирүү кабыл алынып, анда ЕАЭБ өлкөлөрүнүн энергиянын кайра жаралуучу булактарын өнүктүрүүдө өз ара кызматташууну кеңейтүү зарылчылыгы баса белгиленген.