Мал көбөйүп, жер кыртышына суу сиңбей калууда. Бул тууралуу өзгөчө кырдалдар министринин орун басары Урматбек Шамырканов Жогорку Кеңештин жыйынында билдирди. Анын айтымында, тоолордо чөп аз болууда."Селдин жүрүшүнө курулуштардын тиешелүү талаптар сакталбай жүргүзүлүшү, арык, каналдардын жоктугу же тазаланбай таштындыга толушу себеп. Ошондой эле малдын көбөйүшүнөн улам тоодо чөп азайып, суу жер кыртышына сиңбей калып жатат", — деди Шамырканов.Министрдин орун басары депутаттардын суроолоруна жооп берип жатып соңку убакта локалдуу жаан-чачындар көп болуп жатканы дагы селдин себептеринин бири экенин белгиледи.
Баку шаарында Чыңгыз Айтматовдун эстелигинин ачылыш аземи болду. Бул тууралуу мамлекет башчынын маалымат кызматы кабарларды.Ага ылайык, салтанатка Садыр Жапаров менен Илхам Алиев катышкан.Президенттер Чыңгыз Айтматовдун эстелигинин ачылышы Кыргызстан менен Азербайжандын ортосундагы достуктун, бир туугандыктын жана биримдиктин символу экенин белгилешти. Ошондой эле Алиев жазуучу менен болгон жолугушуусун эстеп, анын жарандык позициясын жана өз тамырларына берилгендигин билдирген.Президент Жапаров өз сөзүндө Чыңгыз Айтматовдун мурасына болгон өзгөчө жылуу мамилеси жана залкар жазуучуга арналган юбилейлик иш-чараларды уюштурууга кошкон жеке салымы үчүн Илхам Алиевге ыраазычылык билдирип, Азербайжан элине тынчтык, бакыт жана бакубатчылык каалады.Эстелик Бакунун Азадлык борбордук көчөлөрүнүн бириндеги паркка орнотулду.
Жалал-Абад облустук ички иштер башкармалыгы жарандарды банк карталарынан акча уурдаган шылуундардан сак болууну эскертти.Мекеменин маалымат кызматы белгилегендей, акыркы мезгилде банк кызматкеримин деп телефон чалып, ар кайсы себеп, шылтоолорду айтып банктык картанын номерин жана кодун сурап, андагы акчаны уурдаган фактылар көбөйүүдө."Тааныбаган жана белгисиз номерлерден чалып банктык карта тууралуу сураса ишенип албаӊыздар жана көрсөтүлгөн сандарды айтпаӊыздар", — деп жазылат ИИМдин маалыматында.Ошондой эле мекеме үч ай ичинде облус аймагында телефон, автоунаа, акча жана интернет тармактары аркылуу алданган 90дон ашуун арыз катталып, жарандар ири өлчөмдөгү материалдык зыян тартканын кошумчалады.
Азербайжан-Кыргыз өнүктүрүү фондунун уставдык капиталы төрт эсе көбөйтүлөт. Бул тууралуу Экономика жана комерция министрлигинен билдиришти.Маалыматка ылайык, Садыр Жапаровдун Азербайжанга жасаган мамлекеттик сапарынын алкагында эки өлкөнүн өкмөттөрүнүн ортосунда тиешелүү келишимге кол коюлган.Ага ылайык, фонддун капиталы 25 миллион доллардан 100 миллионго жеткирилет.
Россияга жөнөтүлгөн 350 тонна гуманитардык жардам Оренбург облусуна жеткирилгенин ӨКМден билдиришти.Жүктү Россиянын жарандык коргонуу, өзгөчө кырдаалдар жана табигый кырсыктардын кесепеттерин жоюу министри Александр Куренков тосуп алуп, жардамды алып барган ӨКМдин жарандык коргонуу башкармалыгынын башчысы Алмазбек Асанов менен жолуккан."Министр Куренков Кыргызстандын элине жана кыргыз бийлигине терең ыраазылыгын билдирди", — деп жазылат маалыматта.Тамак-аш, кийим-кече, турмуш-тиричилик жана өзгөчө кырдаалдын кесепеттерин жоюуда керектелүүчү каражаттардан турган жалпы 20 автоунаага жүктөлгөн жардамдын бир бөлүгү облустун Илек айылына, экинчи бөлүгү Оренбург шаарына бөлүштүрүлгөнүн айтышты.