БИШКЕК, 24-апр. — Sputnik. Шаршемби, 23-апрелде, Екатеринбургда жаштардын XIV Евразиялык экономикалык "Россия — Евразия: дүйнө — интеграция — өнүгүү — келечек" аталышындагы форуму башталганы Свердлов облусунун сайтында кабарланды.
Быйыл иш-чара эң көп рекорддук сандагы катышуучу — 17 миң кишини топтогон, алар 114 өлкөдөн чакырылган.
Форумга Бразилиядан, Ливандан, Мавританиядан, Замбиядан, Эритреядан, Бахрейнден өкүлдөр биринчи ирет келишкен. Беш күн ичинде чет элдик студенттер, дипломаттар, Россиядагы жана дүйнөдөгү ЖОЖдордун ректорлору билим берүү, илим, эл аралык кызматташуу маселелерин талкуулашат.
Келген коноктордун алдында сүйлөгөн Урал федералдык округунун жетекчилиги форумдун максатына токтолгон.
"Жаштарга колдоо көрсөтүү — Россиянын мамлекеттик саясатынын эң биринчи багыттарынын бири. Президент Владимир Путиндин демилгеси менен "Жаштар жана балдар" деп аталган улуттук жаңы долбоор иштелип жатат. Ал жаңы муундун өнүгүшүнө, мүмкүнчүлктөрүн ишке ашырууга шарт түзүп берүү милдетин койду. Бул мүмкүнчүлүктөрдү колдонуу керек. Жаштардын XIV Евразиялык экономикалык форуму жаңы демилгелердин жаралышындагы эң кубаттуу аянтча болмокчу" , — деп айтылат билдирүүдө.
Свердлов облусунун губернаторунун атынан конокторго анын орун басары Василий Козлов да кайрылган. Ал Орто Уралда илим жана билим берүүнү өнүктүрүүгө абдан жакшы көңүл буруларын белгиледи.
Жаштардын XIV Евразиялык экономикалык форумунун алкагында маданият боюнча "Вокруг света" фестивалы да өттү. Улуттук 19 диаспора Орто Уралда өздөрүнүн маданияты боюнча көргөзмө аянтын даярдаган. Катышуучуларга кол өнөрчүлүк буюмдарды, байыркылар колдонгон буюм-тайымдарды, музыкалык аспаптарды, китептерди көрсөтүп, мастер-класс өткөрүп, улуттук бийлерди аткарып беришкен.